Category: Вести

Во пресрет на 10.коло кај дамите, три екипи се надигруваат за две слободни места во главната етапа напролет

 

Виктори волеј, УГД Студент и Пелистер волеј решаваат за Втората фаза -1

 

Десеттата натпреварувачка рунда кај дамите содржи два дерби меча и уште неколку интересни пресметки коишто може да имаат влијание на табелата, дури и да ги решат дилемите во врска со пласманот во Втората фаза-1 во којашто ќе играат шесте најдобри екипи по есенскиот дел. Работнички Скопје е лидер и многу веројатно ќе ја задржи позицијата затоа што ќе игра со Бами Кор, единствената екипа без освоен сет досега. Вардар жени ќе го пречека составот на Наковски волеј кој го загуби дербито со Работнички Скопје на свој терен минатото коло, но ако се знае дека и утре ќе настапи значително ослабен, тимот од главниот град важи за фаворит. Сепак, со оглед на осумте победи досега, дури и со пораз, Наковски волеј сигурно ќе остане трет, затоа што и со успех во Скопје над Јанта волеј Форца екипата на Струмица жени нема да може да го достигне бодовниот ефект на ривалот. Јанта волеј Форца, пак, е под закана да го загуби петото место, но за да се случи тоа треба да го претрпи четвртиот сезонски пораз, а Виктори волеј да ја забележи шестата победа, овој пат на теренот на Пелистер волеј. Битолчанки не се на ланското ниво, но ако освојат три бода ќе ги задржат шансите за влез во првите шест, а со тоа и за место во Втората фаза -1. На таков успех може да се надева и тимот на УГД Студент жени, но за да го оствари треба да победи утре во Струмица против Македонија Макс, а потоа можеби императив ќе биде и триумф во наредното коло против Работнички Скопје дома. Засега јасно е дека има две отворени места за пласман во главаната фаза, а на нив сметаат три екипи: Виктори волеј, УГД Студент и Пелистер волеј. Ускана и Универзитет во Тетово ќе играат во борба за пласман од 7-то до 12-тото место.

 

Прва лига, жени, 10.коло

Вардар жени – Наковски волеј (сабота, 20.00)
Работнички Скопје – Бами Кор (сабота, 16.00)
Јанта волеј Форца – Струмица жени (сабота, 11.00)
Пелистер волеј – Виктори волеј (сабота, 17.00)
Македонија Макс – УГД Студент (сабота, 18.00)
Ускана – Универзитет во Тетово (сабота, 16.00)

Лирија и Универзитет во Тетово за третото, а Весна Пробиштип и Шкендија за шестото место

 

Осмото коло кај одбојкарите ќе реши две отворени прашања

 

Одбојкарите на Вардар го освоија првото место во нашата најквалитетна одбојкарска конкуренција на теренот на единствениот вистински ривал Џио Струмица, па против ГОК Борец рутински ја одработија максималната, осма победа во шампионатот. Со оглед дека во утрешното коло се слободни, црвено-црните веќе ги завршија обврските во првенството. На актуелниот првак му останува обврската да ги запише планираните два триумфа до крајот на оваа фаза, а првиот ќе го бараат на гостувањето во Велес. ГОК Борец досега се радуваше само еднаш, па јасно е од каква позиција ќе влезе во пресметката со струмичани коишто во пресрет на осмото коло се второпласирани само поради подобар сет-количник од Лирија. Составиот од Жеровјане влезе во победничка серија против екипите со понизок ранг, па заслужи да игра во Втората фаза-1 напролет, а со тоа да биде во друштво на тимовите што ќе се борат за пласман во разигрувањето за титулата. Лирија утре ќе го брани третото место на табелата во директна пресметка со Универзитет во Тетово. Ланскиот финалист загуби од двата најдобри состава по што падна на четвртата позиција, но доколку слави над Лирија со 3:0 или со 3:1, тогаш ќе го потисне противникот од водечкото трио. Сепак, дури и да не успее во намерата, Универзитет во Тетово секако ќе настапи во елитниот натпреварувачки сегмент напролет, а тоа важи и за УГД Студент. Штипјани имаат три победи, но утре ќе ја пречекаат Дибра волеј, така што очекувано е да слават, а со тоа да го обезбедат најмалку петтото место. Како што стојат работие пред завршните две рунди, за шестото ќе решаваат Весна Пробиштип и Шкендија, в понеделник, со пренос на МРТ Собраниски од 19 часот и 30 минути. Во салата на ривалот тетовци ќе истрчаат со две победи, а пробиштипјани имаат една, но доколку успејат да го победат поранешниот првак, тогаш ќе стигнат до посакуваното шесто место. Последното коло нема да има никакво влијание затоа што Шкендија ќе биде слободна, а Весна Пробиштип ќе се сретне со Дибра волеј, но дури и да триумфира, тоа нема да значи ништо без успех во директното соочување со Шкендија.

 

Прва лига (мажи), 8.коло

ГОК Борец – Џио Струмица (сабота, 15.30)
Лирија – Универзитет во Тетово (сабота, 19.30)
УГД Студент – Дибра волеј (сабота, 15.00)
Весна Пробиштип – Шкендија (понеделник, 19.30, пренос на МРТ Собраниски)

***Во ова коло слободна е екипата на Вардар

Прва лига (мажи), 9.коло
Вардар – ГОК Борец 3:0 (25:9, 25:9, 25:16)

Џио Струмица – Вардар 0:3 (16:25, 14:25, 22:25)

 

Вардар го задржа максималниот ефект и лидерското место

 

Неочекувано лесно Вардар ја совлада Џио Струмица со 3:0 (25:16, 25:14, 25:22) и го обезбеди првото место на крајот на есенскиот дел во Првата машка одбојкарска лига. Во дербито на сезоната, црвено-црните беа убедливи во салата “Парк” и му се реваншираа на бранителот на двојната круна за ланските пет порази во шесте меѓусебни пресметки. Во тековното првенство засилени со тројца струмичани, Васе Михаилов, Филип Маџунков и Стојан Николов, како и со поранешниот македонски репрезентативец Јовица Симовски, црвено-црните беа подобри во сите елементи во последниот натпревар од деветтото коло. Имаа подобар прием, сигурен напад преку Симовски, одличен сервис и подобра одбрана, така што беа во негатива само во третиот сет. Но без оглед на позитивата од 11:4, Џио Струмица не успеа да му го откине првиот сет на Вардар во седмиот настап сезонава. Скопскиот тим го задржа максималниот биланс, а струмичани ќе презимат на втората позиција.

 

Јовица Симовски беше најефикасен со 25 поени, а другите вардарови играчи освоија вкупно 26. Илиев 11, Маџунков 6, Михаилов 4, Лепидовски 3 и Стојанов 2. Кај Џио Струмица Николов заработи 10, Урдов 8, Наков 5, а примачите имаа само 9 поени, Суботиќ 5 и Балџиев 4.

 

По дербито, Вардар ќе биде слободен во наредното коло, па во деветтото ќе игра со ГОК Борец, додека, пак Џио Струмица ќе се сретне со ГОК Борец и со Лирија.

Шампионките го вратија ударот, па веќе нема непоразен тим во Првата лига (жени)

 

Скопјанки ги добија пресметките со струмичките противнички

 

Откако загуби од Струмица жени, бранителот на ланската двојна круна, екипата на Работнички Скопје, оствари две победи над противнички од истиот град и го презеде врвот на табелата во Првата лига (жени). Во деветтото коло, првенките се радуваа на теренот на Наковски волеј и му го нанесоа првиот пораз сезонава, по што во елитната конкуренција веќе нема состав со максимален ефект. Изненадува текот на натпреварот на дербито во коешто немаше резултатска неизвесност, па гостинките минаа полесно од очекувањата. Уште поубедлив беше Вардар жени против Виктори волеј препуштајќи им на ривалките само 41 поен, па сега три екипи имаат идентичен биланс 8-1 и по 24 бода, но поради подобар сет-количник Работнички Скопје е лидер по оваа натпреварувачка рунда, Вардар жени е втор, а Наковски волеј падна од лидерското на третото место.

 

Чекорот со водечкото трио го одржува и дебитантот во лигата, тимот на Струмица жени, којшто во саботата во три сета триумфираше над Пелистер волеј. Битолчанки лани играа во Втората фаза -1, но сезонава досега славеа само трипати, па имаат само теоретски шанси да ја освојат шестата позиција, а на тој начин повторно да се најдат во главниот сегмент напролет. До него блиску е Јанта волеј Форца со оглед дека по успехот против Ускана пред своја публика со 3:2, поранешните првенки се петтопласирани со шест победи, една повеќе од Виктори волеј и две во однос на екипата на УГД Студент жени. Во ова коло, штипјанки со службен резултат против Универзитет во Тетово ја впишаа четвртата победа, па теоретски се уште можат да се надеваат да напредуваат иако шансите не им се најизгледни поради фактот што во последното есенско коло ќе играат со Работнички Скопје. Од овој аспект, Македонија Макс и Бами Кор можат да ги одиграат последните два меча растоварено, затоа што сигурно ќе бидат дел од послабата натпреварувачка група напролет. Македонија Макс го доби меѓусебниот дуел викендов со 3:0, се израдува на втората првенствена победа, додека, пак, тетовскиот тим остана единствен без освоен сет досега.

 

Прва лига (жени), 9.коло

Наковски волеј – Работнички Скопје 0:3 (17:25, 21:25, 14:25)
Виктори волеј – Вардар жени 0:3 (14:25, 19:25, 8:25)
Струмица жени – Пелистер волеј 3:0 (25:20, 25:16, 25:5)
Јанта волеј Форца – Ускана 3:2 (21:25, 25:9, 25:27, 25:22, 15:10)
УГД Студент жени – Универзитет во Тетово 3:0 (службен резултат)
Бами Кор – Македонија Макс 0:3 (8:25, 16:25, 12:25)

Време е за најголемото дерби: Џио Струмица – Вардар на МРТ Собраниски од 17 и 25

 

Ова е ден за одлука за лидерот по есенскиот дел од Првата лига во машка конкуренција. Во салата „Парк“, Џио Струмица ќе го пречека Вардар во дуелот на двете најсилни екипи кај нас сезонава. Бранителот на ланската двојна круна во меѓусебната пресметка ќе влезе од второто место на табелата не само поради тоа што беше слободен во претходното коло, туку и затоа што загуби два сета и еден бод на досегашните пет настапи, за разлика од Вардар којшто има максимален ефект на шест натпревари. Струмичани минатата сезона беа доминантни во сочувањата со скопскиот ривал и добија пет од вкупно шест. На свој терен Џио Струмица двапати славеше со 3:0 и двапати со 3:1, но денешниот натпревар ќе биде во поинакви околности затоа што Вардар во ова првенство се засили со тројца струмичани коишто се актуелни членови на македонската репрезентација: Васе Михаилов, Филип Маџунков и Стојан Илиев, како и со поранешниот нејзин коректор Јовица Симовски. Токму затоа шансите за победа се подеднакви, веројатно ќе решаваат нијанси, но кој и да триумфира, со оглед на околностите во нашата машка одбојка, на зимска пауза ќе замине како првопласиран на табелата.

 

Зад водечката двојка засега е Лирија која во седмото коло очекувано се радуваше на гости кај Дибра волеј со 3:0, па без оглед на триумфот на Универзитет во Тетово над ГОК Борец, исто така во три сета, тимот од Жеровјане ја задржа третата позиција затоа што има пет победи, една повеќе од ланскиот финалист во купот Универзитет во Тетово. Во саботата голем резултат оствари УГД Студент во туѓа сала против Шкендија, а со тоа го обезбеди настапот во Втората фаза -1 напролет. Откако со 3:0 ја решија тетовската загатка, штипјани имаат три победи и во наредното коло ќе ја пречекаат екипата на Дибра волеј и ќе завршат најмалку петти во овој натпреварувачки сегмент. Поранешниот шампион Шкендија, пак, е во непријатна ситуација бидејќи шестото место треба да го брани на гостински терен против Весна Пробиштип во наредното коло. Доколку загуби, тогаш сигурно нема да биде дел од најдобата шестка затоа што во деветтото, последно есенско коло ќе биде слободна, а пробиштипјани, коишто одмораа овој викенд, до крајот ќе се сретнат и со Дибра волеј.

 

Прва лига (мажи), 7.коло

Џио Струмица – Вардар (денеска, 17.30, пренос на МРТ Собраниски)
Дибра волеј – Лирија 0:3 (13:25, 15:25, 13:25)
Универзитет во Тетово – ГОК Борец 3:0 (25:15, 25:10, 25:15)
Шкендија – УГД Студент 0:3 (20:25, 20:25, 18:25)

***Во ова коло слободна беше екипата на Весна Пробиштип

Петар Јовановски ќе биде претседател на Балканската одбојкарска асоцијација, а ние домаќини на Балканијадите во одбојка на песок во 2020

 

Како и во 2012-тата, првиот човек на нашата одбојка, Петар Јовановски, ќе биде претседател на Балканската одбојкарска асоцијација (БВА) во наредната година. Ова го решија делегатите на 21-от конгрес на БВА којшто денеска беше одржан во Букурешт. Со едногласна одлука, делегатите го прифатија предлогот на нашиот претставник, генералниот секретар на ОФМ, Зоран Карановиќ, нашата федерација да го преземе управувањето со БВА. Како и годинава, потпретседател на БВА ќе остане Зоран Гајиќ, кој е претседател на Српскиот одбојкарски сојуз.

 

На Конгресот се обрати претседателот на Европската одбојкарска конфедерација (ЦЕВ), Александар Боричиќ, кој потсетувајќи дека пред четири години токму БВА беше инцијатор да ја почне трката за прв човек на ЦЕВ, најави дека ќе се кандидира за уште еден мандат. Делегатите на Конгресот на БВА во Букурешт повторно му изразија безрезервна поддршка. Изборното собрание на ЦЕВ е закажано за 19-ти јуни во Москва.

 

Покрај овие одлуки, како што е вообичаено, највисокото тело на БВА ги одреди домаќините на претстојните балкански првенства. Ние ќе бидеме организатори на Балканијадите во одбојка на песок во машка и во женска конкуренција на коишто право на настап ќе имаат одбојкари и одбојкарки до 20 години. Во Србија ќе бидат одиграни турнирите за пионерки, за кадети и за кадетки, јуниорите и јуниорките ќе се натпреваруваат во Косово, пионерите во Грција, а детскиот фестивал на БВА ќе биде во Романија, која според најавите, ќе биде домаќин на Балканското првенство во одбојка на снег во 2021-вата. Ако се реализира ова, тоа ќе биде прво официјално одбојкарско натпреварување во оваа дисциплина, така што во овој контекст, Балканската одбојкарска асоцијација ќе биде пионер во однос на сите зонски асоцијации во Европа и во светот.

Тројна програма во Струмица во деветтото коло во Првата лига (жени)

 

Наковски ќе го брани максималниот ефект во дербито против шампионките

 

Без оглед што ќе преостанат уште две натпреварувачки рунди до крајот на есенскиот дел и работите се уште ќе може да се менуваат, се чини дека деветтото коло ќе има големо влијание на изгледот на табелата во Првата лига (жени). Во тројната струмичка програма дербито е меѓу двете најдобри екипи досега, Наковски волеј и Работнички Скопје. Одбојкарките на Наковски волеј се единствени со максимален ефект, а актуелните првенки загубија на гости кај дебитантот Струмица жени, па се второпласирани поради подобар сет-количник од Вардар жени. Малата разлика во билансот на водечкото трио е шанса за црвено-црните да го преземат врвот, но само под услов да слават со 3:0 на теренот на Виктори волеј, а Работнички Скопје да го совлада Наковски волеј со 3:1. Со таков расплет, вардарки ќе имаат подобар сет-количник од Работнички Скопје, а постои можност да го прескокнат Наковски волеј поради повисок поен-количник.

 

Екипата на Струмица жени нема опција да да напредува, но доколку го искористи домашниот терен против Пелистер волеј, тогаш со сигурност ќе го задржи четвртото место. Битолчанки засега не успеаја да го одржат резултатското ниво од лани, остварија три триумфи, така што за да играат повторно во Втората фаза -1 напролет, немаат друга алтернатива освен победа над струмичанки. Пелистер волеј заостанува за два триумфа во однос на Виктори волеј и на Јанта волеј Форца, па гледано според квалитетот на претстојните противници, поголема можност да притисне да биде меѓу првите шест има тимот на УГД студент жени. Услов за тоа е денешен успех во својата сала над Универзитет во Тетово. Тогаш штипјанки би имале четири победи и би биле еден чекор зад Виктори волеј доколку струмичанки загубат од Вардар жени. Позицијата на Јанта волеј Форца е покомотна, затоа што утре ќе се сретне со Ускана пред своја публика, па со очекувани три бода може да се случи дури и теоретски да го затврои прашањето околу настапот во главниот натпреварувачки сегмент напролет. Од тој аспект, безначаен ќе биде мечот во којшто Бами Кор ќе се обиде да го освои првиот сет, бод или да ја оствари првата победа сезонава, а Македонија Макс да слави вторпат во натпреварувачката 2019-та/2020-та.

 

Прва лига (жени), 9.коло

Наковски волеј – Работнички Скопје (сабота, 18.00)
Виктори волеј- Вардар жени (сабота 16.00)
Струмица жени – Пелистер волеј (сабота, 18.00)
Јанта волеј Форца – Ускана (сабота, 13.00)
Бами Кор – Македонија Макс (сабота 16.00)
УГД Студент жени – Универзитет во Тетово (денеска, 17.30)

Најголемото дерби е содржина на седмото коло во Првата машка лига

 

Кулминацијата на сезоната е во Струмица, првакот против претендентот за тронот

 

Џио Струмица против Вардар! Тоа е најзначајниот натпревар во есенската етапа од нашата најквалитетна машка одбојкарска конкуренција. Актуелниот шампион против главниот конкурент за титулата сезонава. Надигрување за првото место во овој натпреварувачки сегмент, коешто не мора ништо да значи, но секако ќе донесе задоволство кај победникот. Струмичаните Михаилов, Илиев и Маџунков ќе истрчаат на теренот во салата „Парк“ против своите, а прваците ќе се хранат од мотивот да покажат дека и покрај нивното заминување од Џио Струмица, екипата го има потребниот квалитет за да го освои осмиот лигашки трофеј. Вардар има два, последниот во 2012-тата/2013-тата, а првиот во вториот шампионат на независна Македонија. Во премиерниот по осамостојувањето најуспешна беше Струмица, така што овој дуел на тимовите на Џио Струмица и на Вардар му дава и привлечна историска нишка на тековното првенство. Оттука, јасно е дека сите други натпревари од седмото коло во Првата лига (мажи) ќе биде во сенка на дербиото коешто ќе оди во пренос на Собранискиот сервис на МРТ в понеделник од 17 и 25.

 

Лирија денеска ќе му гостува на составот на Дибра волеј со амбиција да победи, а со тоа и да ја задржи третата позиција на табелата. Првите две засега се резервирани за непогрешливите Вардар и Џио Струмица, со напомена дека скопјани одиграа шест, а струмичани пет меча. Лирија има биланс 4-1, но дури и со планираниот успех во Дебар со 3:0, не може да ја загрози Џио Струмица на второто место поради полош сет-количник. Дибра волеј ги загуби сите пет средби, но освои три сета, што за тимот е напредок во однос на ланската дебитантска сезона во лигата.

 

Јасна фаворитска улога има и Универзитет во Тетово против ГОК Борец, а доколку ја потврди, домашниот состав ќе ја забележи четвртата победа и со тоа ќе остане во трка со Лирија за третото место. Тетовци претходно загубија од Вардар и од Џио Струмица, па не можат да се надеваат на повисок пласман. Велешани, пак, триумфираа над Дибра волеј и за нив теоретски се уште постојат опции за влез во Втората фаза -1, но во таа насока огромна предност пред нив имаат УГД Студент и Шкендија. И тоа не само поради двете победи досега, туку и поради силата на екипата. Токму затоа нивниот меѓусебен дуел најверојатно ќе реши кој ќе дел од најдобрата шестка напролет иако не треба да се заборави и на можноста во Втората фаза -1 да се најдат пробиштипјани кои се слободни во ова коло.

 

Прва лига (мажи), 7.коло

Џио Струмица – Вардар (понеделник, 17.30, пренос на МРТ Собраниски)
Дибра волеј – Лирија (денеска, 19.00)
Универзитет во Тетово – ГОК Борец (сабота, 19:30)
Шкендија – УГД Студент (сабота, 18.00)

***Во ова коло слободна е екипата на Весна Пробиштип

Македонските одбојкари ќе дебитираат во „Златната Европска лига“

 

По Европското првенство 2019, нов голем предизвик за црвено-жолтите

 

Откако ја почувствуваа сласта од настап на европските првенства, а со впечатокот на последниот континентален собир го заслужија местото во елитата, македонските одбојкарски репрезентативци наредната година првпат ќе играат во „Златната Европска лига“

 

Трипати беа финалисти, но немаа среќа да се израдуваат на пехар, па црвено-жолтите ја кренаа летвичката и во 2020-тата ќе дебитираат во највисокиот натпреварувачки ранг, односно во „Златната Европска лига“. Тоа е награда за одличните резултати на премиерното европско првенство за нас, на коешто во септември нашите одбојкари ја совладаа Белорусија и коорганизаторот, европската сребрена селекција Словенија. Со оглед дека е 21-ви на ранг-листата на ЦЕВ., македонскиот национален состав во мај и во јуни ќе одигра најмалку шест натпревари со исклучително квалитетни противници. Во престижната конкуренција највисокорангирана е Белгија како шеста одбојкарска сила на континетот, а зад неа, но во првите десет е и Холандија. Покрај нив, ќе учествуваат и Чешка, Турција, Украина, Словачка, Шпанија, Естонија и Португалија, како и послабо рангираните од нас Белорусија и Романија. 12-те репрезентации ќе бидат поделени во три групи со по четири,секој ќе одигра со секого дома и на гости, првото коло е планирано за викендот на 23-ти или на 24-ти мај, а последното, шесто, на 13-ти или на 14-ти јуни. Завршниот турнир ќе биде закажан на 20-ти и на 21-ви јуни.

 

Покрај трите сребрени медали досега, македонската репрезентација беше бронзена во Европската лига во 2014-та, а лани го освои четвртото место. Овој пат, во друштво на најдобрите, генрацијата на Никола Ѓорѓиев ќе се обиде да остане на квалитативно ниво како во Љубљана, каде што за нијанса не успеа да обезбеди пласман во осминафиналето на европскиот шампионат. Квалификациите за наредниот ќе почнат во август, така што настапот во „Златната Европска лига“ ќе им овозможи на нашите одбојкари да бидат на највисоко натпреварувачко ниво во обидот да остварат постојаност во учествата на континенталните првенства.

Вардар – Универзитет во Тетово 3:0 (25:16, 25:12, 25:13)

 

Доминација на лидерот во дербито на шестото коло

 

Одбојкарите на Вардар го прегазија Универзитет од Тетово во натпреварот што барем на хартија го носеше епитетот дерби на шестото коло во Првата машка одбојкарска лига. Гостите во салата “Кале” во Скопје освоија вкупно 41 поен, средбата заврши за помалку од еден час, а тоа се доволни параметри за да ги отсликаат настаните на теренот.

 

Вардарци остануваат први на табелата со максимални шест победи досега, а тетовци се четврти затоа што имаат три триумфи, еден помалку од третопласираната Лирија. По двете зоочувања на Универзитет во Тетово со Вардар и со Џио Струмица, се остварија прогнозите дека за лидерската позиција по есенскиот дел ќе решава меѓусебниот натпревар меѓу актуелниот првак и скопскиот тим. Тој ќе биде дел од наредното, седмо прволигашко коло, а предноста на домашниот терен ќе ја имаат струмичани.