Category: Вести

Искрени честитки и планови за соработка на приемот на македонските одбојкари во АМС

 

Директорот на Агенцијата за млади и спорт, Наумче Мојсовски, ги прими македонските одбојкари и претставниците на ОФМ по обезбедениот пласман на Европското првенство 2021. Покрај искрените честитки, Мојсовски изрази желба за долгорочна соработка заради обезбедување развој на одбојката кај нас.

 

„Задоволството е мое што денеска сум домаќин на овие великани коишто ги заслужија сите почести и аплаузи. Цел на куќата на спортот е да се направат што повеќе бази, со цел нашите репрезентативци да имаат каде да се сместат и каде да тренираат. Тоа да биде база каква што ја заслужуваат, знаеме дека тоа во Европа се случува, мораме да почнеме од некаде и се надевам на ваша соработка, дека ќе ја одредите таа база, ќе кажете каде ќе биде, а ние како Агенција за млади и спорт ќе помогнеме тоа да се реализира“, рече директорот Мојсовски.

 

„Искрено, мора да потенцирам дека имаме прекрасна соработка со АМС последните 3-4 години. Да, нам ни е потребна куќа на одбојката, дом на одбојката, сите други федерации го решија ова прашање, па очекуваме годинава и ние да го изградиме тој дом, затоа што го заслужуваме, а за нас ќе биде уште поголем мотив да работиме и да постигнуваме врвни резултати. Исто така, би побарал рамноправност за играчите. Фудбалерите добија награда, се пласираа на ЕУРО, им честитам, но и ние се наоѓаме на завршница на европско првенство, па сметам дека сите треба да издејствуваме, да побараме од Владата и одбојкарите да добијат иста награда“, изјави претседателот на ОФМ Петар Јовановски.

 

Македонските одбојкари вторпат ќе играат на континенталните самити, па сегашните очекувања се поинакви од оние во 2019. Тогаш, црвено-жолтите остварија две победи, првата, историска, беше над Белорусија, а втората над актуелниот европски вицепрвак Словенија, така што сега апетитите растат, особено што на патот до новиот успех нашите репрезентативци остварија победа над подобро рангираната Турција.

 

„Среќни сме за успехот што го направивме, ќе биде од корист не само за нас во репрезентацијата, туку и за развојот на целата одбојка. Нема да застанеме тука, ќе одиме на Европското првенство 2021 за да ги кренеме стандардите и да оствариме уште подобар резултат од претходниот континентален шампионат“, изјави примачот на макеоднскиот состав Владо Милев.

 

„Сакам да упатам благодарност до Одбојкарската федерација којашто организираше одличен турнир на високо ниво и ни овозможи светски услови за подготовка. Исто така, сакам да укажам дека сега имаме одлични генерации на младинци и на кадети коишто треба да ги поддржиме, за да бидат наша достојна замена кога ќе замине сегашната генерација во репрезентацијата. Мислам дека сме на добар пат да ја кренеме одбојката на повисоко ниво“, оптимист е средниот блокер Ристо Николов.

 

Убавата одбојкарска приказна продолжи, но периодот за прослава ќе биде релативно краток, затоа што репрезентацијата ќе ја почне новата активност веќе во мај за кога се закажани натпреварите од Европската лига. Златниот медал во таканаречениот сребрен сегмент од неа е посакувана цел, а потоа следи континенталниот самит со желба за чекор понапред од Љубљана. Македонската одбојка влезе во циклуси од мотиви и од желби, а тоа засега е основа за ветувачка иднина.

Македонија на Европскооооооооо!

 

Македонските одбојкари повторно ќе играат на европско првенство. Ја совладаа Турција со 3:1 (25:19, 21:25, 25:23, 25:18) и уште отсега обезбедија влез во континенталното елитно друштво. Никола Ѓорѓиев и Алелксандар Љафтов одиграа маестрално, но имаа одлична поддршка од сите репрезентативци, коишто примаа многу подобро од претходните натпревари на скопскиот квалификациски турнир, се бореа в поле, извлекуваа тешки топки, поставуваа пасивни блокови и освојуваа директни поени од нив, така што фаворитот на хартија немаше шанса да го запре триумфалниот поход на македонскиот национален тим.

 

Капитенот Ѓорѓиев торпедираше со 24, Љафтов со 23 поени, Милев заврши со 5, Андонов и Николов со по 4, а техничарот Ѓорѓи Ѓорѓиев освои два поена. Македонската репрезентација одлично се бранеше од турскиот коректор Лагумџија и го задржа на 14 поени, а најефикасен беше примачот Субаши со 17. Тоа не беше доволно ривалот да го запре нашиот тим, но и тој се радуваа затоа што го освои првото место во групата “Це’ и ќе игра на еврошампионатот во Полска, во Чешка, во Естонија и во Финска.

 

Со три победи и со девет бода на турнирот во арената „Борист Трајковски“, македонските одбојкари имаа ист ефект како и Турците, кои се првопласирани поради подобар сет-количник. Ние сме најдобри второпласирани од три завршен групи досега, така што не постои теорија која би попречила да играме на Европското првенство 2021 планирано во терминот од 15-ти август до 30-ти септември.

 

Вторпат по ред, македонската одбојка слави пласман на континентален самит. Со јубилејната 70-та победа во официјалните 152 натпревара, ние сме во престижното друштво. Повторно голема радост за македонската нација. Македонија на Европскооооооо!

Само една победа за второ европско првенство, македонските одбојкари денеска против Турција (МТВ-3 од 17 и 30)

 

Калкулациите во одбојката се прават најтешко, решаваат многу параметри, но победничката опција за македонските одбојкари денеска против Турција е едноставна. Со триумф од 3:0 и 3:1, вторпат во историјата, македонската репрезентација ќе биде во друштво на најдобрите во Европа. Задачата не е лесна, Турција беше доминантна на квалификацискиот турнир во Скопје за учество на Европското првенство годинава, се радуваше на првиот дуел со нас со 3:1, но вториот сет од тој натпревар создаде оптимизам дека црвено-жолтите денеска можат да се надеваат на резултат со којшто ќе ја остварат конечната цел, или, пак, значително ќе се доближат до неа.

 

Победа од 3:0 ќе значи прво место за македонските одбојкари во групата „Це“ поради подобар сет-количник од Турција. На тимот на селекторот Недим Озбеј му е доволен еден сет за да го сочува врвот и да обезбеди директен пласман на континенталниот самит. Доколку не успеат да бидат резултатски доминантни, прифатлив епилог за македонскиот тим ќе биде и триумф со 3:1 за второ место во групата, но со огромни шанси уште вечерва да биде обезбеден пласманот на еврошампионатот, Во овој случај нашата селекција ќе го освои второто место, но со огромна веројатност ќе има подобар ефект од Шпанија, која беше втора во групата „Де“, а секако ќе се најде пред второпласираниот во групата „Бе“ во Израел. Со победа со 3:2, македонските одбојкари, исто така, ќе имаат широко отворена врата кон Европското првенство 2021, но ќе треба да го чекаат епилогот од преостанатите четири квалификациски групи закажани за во мај. Така ќе биде и со каков било пораз.

 

Оттука, иако Турција е фаворит и е на сет од 11-ти настап на европските првенства, македонските одбојкари веруваат дека можат да го повторат вториот сет од мечот во средата во текот на целиот денешен натпревар во арената „Борис Трајковски“. Тоа ќе биде вкупно 152-ри официјален натпревар во историјата броејќи ги европските првенства, Европската лига, како и квалификациите за ЕП, за СП и за олимписките игри. Доколку се оствари, 70-тата победа ќе донесе нови незаборавни моменти за македонската одбојка.

Со 3:0 и 3:1 утре против Турција, одиме на Европско

 

Македонските одбојкари се на чекор до сигурен пласман на Европското првенство годинава. Доколку утре ја совладаат Турција со 3:0 или со 3:1 во сетови, тогаш ќе го прослават вториот влез во континенталната елита. Во првиот случај ќе завршат први на турнирот во арената „Борис Трајковски“ во Скопје, а во вториот до целта ќе стигнат како една од петте најдобри второпласирани репрезентации во седумте групи.

 

Откако Турците очекувано славеа над Босна и Херцеговина со 3:0 (25:9, 25:19 и 25:18), во утрешната пресметка со нас ќе влезат со три победи, со максимални девет бода и со сет-количник 9-1. Тоа значи дека доколку ние го добиеме натпреварот со нив со 3:0, ќе имаме сет повеќе и ќе го освоиме првото место на табелата во групата „Це“, а доколку триумфираме со 3:1, ќе останеме зад нив поради полош сет-количник, но ќе имаме подобар ефект од Шпанија која заврши втора во групата „Де“ со поен-количник 1.006, а најверојатно и од второпласираниот во групата „Бе“ во којашто Израел денеска ја доби Австрија. Со победа со 3:2 или со каков било пораз, ќе ја чекаме разврската од преостанатите четири квалификациски групи закажани за во мај. За да не се случи тоа и да решаваат сами за себе, македонските одбојкари треба да победат со резултат 3:0 или со 3:1 против Турците.

 

Не е лесно, но е остварливо!

13 дена, 21 тренинг, 45 часа на терен, прва победа

 

Македонските одбојкарски репрезентативки до 19 години минаа убав јануари во Берово, како што беше реализирана уште една периодична месечна фаза од подготовките за настап на Европското првенство во 2022 коешто ќе се одржи кај нас. Селекторот Ненад Михајловиќ реши да работи со помал број девојки, во случајов 18, што не знали дека преостанатите десет се избришпани од списокот и нема да добијат шанса да конкурираат за тимот што ќе игра на континенталниот собир.

 

„Одлично работевме, трениравме двапати дневно, минавме многу време во сала, одигравме два тренинг натпревара со екипата на Струмица жени, ја забележавме првата победа. Тоа се разбира дека не е важно, но за нас беше симболичен момент и сите му се радуваме. По големиот број тренинзи, едноставно беше време да почнеме да се тестираме на натпревар. Повторно работиме на техника, но низ игра, а тоа е тешко“, селекторот Михајловиќ ги опиша подготовките во Берово, потенцирајќи дека идејата е сите девојки да останат во ритам, да играат подеднакво за да не се почувствува разлика во насока на тоа која е во прва, а која во втора линија.

 

Поради здравствената ситуација и протоколите, пријателските натпревари во Белград беа откажани, а тој план ќе остане актуелен за некој друг термин, можеби за годинашниот турнир на градови. „Се мина во најдобар ред, без повреди и болести. Задоволни сме од напредокот и од посветеноста на репрезентативките“, вели координаторката за женска одбојка кај нас Емилија Терзиевска. Со задоволство информира за зголемената активност во нашата женска одбојка во којашто се удираат темелите на новата сениорска селекција.

 

„На 10-ти јануари во Берово дојдоа и 42 пионерки од поширокиот список од цела Македонија. Селекторот Милан Ристовски, кој е клупски тренер во Бами Кор, одбра 14, според него, најподготвени, коишто имаат настапи за прволигашките екипи и постојано се во тренажен процес беа оглед на коронавирусот. Неколку одбојкарки отсуствуваа од овој собир поради тоа што се во изолација“, објаснува Терзиевска.

 

Македонските одбојкарки денеска се разделија, но само привремено. Наредниот собир ќе биде во феврари, а како што најавува стручниот штаб, најверојатно со присуство на сите репрезентативки од поширокиот список.

Првото место е се уште достижно, но и без него можеме да ја минеме европската граница

 

Уште по ждрепката за квалификациските групи беше совршено јасно дека Турција е фаворит за пласман на Европското првенство годинава, но без оглед на тоа, избраниците на селекторот Недим Озбеј се уште немаат математичка потврда на првото место на турнирот во Скопје. Тоа нема да се случи ниту денеска, дури и со очекуван триумф над Босна и Херцеговина со три одиграни сета (пренос на МТВ-1 и на МТВ-3 од 17 и 30).

 

А тоа е сосема реален облог ако се видат бројките од нивниот натпревар пред три дена во арената „Борис Трајковски“ во Скопје. Турскиот сервис беше исклучително квалитетен, па босанскиот национален тим не можеше да организира напад. Субаши освои шест аса од вкупно 19 поени, а Лагумџија и Ѓулмезоглу беа одлична поддршка, така што осминафиналистот од последниот шампионат одигра доминантно и со две победи досега, со шест бода и со сет-количник 6-1 ја предводи групата „Це“ во пресрет на завршните две средби.

 

Откако македонските одбојкари вчера забележаа победа над БиХ, ја вратија самодовербата затоа што одиграа на повисоко ниво споредбено со првиот меѓусебен дуел, а денеска имаат ден за одмор и за анализа на својата и на играта на турската репрезентација. Доколку Турција ја заврши денешната задача со 3:0, тогаш за прво место нам ќе ни биде потребна идентична победа утре против екипата предводена од искусниот техничар Екши. Секој друг резултат ќе значи директен пласман на турскиот состав на континенталниот самит во Полска, во Чешка, во Естонија и во Финска. Со 3:1 најверојатно нема да успееме поради полош поен-количник, а со 3:2 за нас поради помал број бодови.

 

Но, македонската репрезентација може да биде во друштво на европската елита и со второто место во групата, а за да ја отвори вратата што повеќе, потребно е да се обиде да го подобри досегашниот ефект. Со две победи и шест бода ќе бидат реални надежите за позиција меѓу петте второпласирани во седумте квалификациски групи, но со каков било триумф или, пак, со два сета, односно еден бод од утрешниот натпревар со Турција, вратата кон Европското првенство 2021 ќе биде отворена уште повеќе.

Максимална победа и шест бода против Босна и Херцеговина, македонскот тим ги задржа шансите за ЕП

 

Македонските одбојкари славеа против Босна и Херцеговина со 3:0 (25:20. 26:24, 25:13) во третиот натпревар за нив на скопскиот квалификациски турнир за Европското првенство во септември, а со тоа го обезбедија најмалку второто место во групата „Це“. Дарко Ангеловски го замени Васе Михаилов на позицијата либеро, приемот беше постабилен, дистрибуцијата на топки сооветна, па противникот не можеше да парира како во понеделникот кога освои сет. Позитивно е што црвено-жолтите денеска одиграа со половина сили и не се потрошија освен во вториот сет кога на крајот мораше малку да притиснат. Нападнавме и со сервис, пасивниот блок ја заврши работата и ја спречи играта на Босна и Херцеговина преку средина на мрежа, па немавме проблем да ја завршиме работата.

 

Александар Љафтов беше најефикасен со 21 поен, капитенот Никола Ѓорѓиев заврши со 17, Владо Милев беше стандарден со седум, а Ристо Николов освои пет. На крајот на натпреварот селекторот Матијашевиќ им даде шанса на Филип Савовски и на Лука Костиќ, кој ги освои последните два поена на средбата. Кај гостите, коректорот Ади Османовиќ впиша 22 поена, а примачот Макаш 9, но за разлика од понеделникот, ривалот не беше голема закана.

 

Македонските одбојкари утре ќе одмораат, па в сабота ќе играат со Турција која е голем фаворит на мечот против Босна и Херцеговина. Победа за нас в сабота најверојатно ќе значи второ европско првенство во нашата историја, но шанса за него имаме и со второто место, па затоа потребен ни е што подобар резултат против Турците кои не совладаа на првиот дуел со 3-1.

Нема предавање за македонските одбојкари, со победа против БиХ (МРТ-1 и МРТ-3), остануваат шансите за ЕП

 

Иако на нивните лица се гледаше разочарување по вчерашниот пораз од Турција, македонските одбојкари немаат време за жалење, затоа што денеска имаат шанса да се вратат на победнички патеки и да останат на курсот кон Европското првенство годинава. За да се случи тоа, треба да одиграат константно против Босна и Херцеговина која досега ги загуби двата натпревара на квалификацискиот турнир во Скопје.

 

Во понеделникот, македонскиот национален тим го совлада противникот со 3:1 (27:25, 25:21, 23:25, 25:19), а за да ги задржи шансите за второ учество на континенталните самити, треба да ги елиминира осцилациите во играта од претходните дуели. Без оглед што е послаборангиран, составот на селекторот Ифет Махмутовиќ имаше два добри сета на првиот натпревар со нас, а расположениот коректор Ади Османовиќ беше постојана закана за македонската одбрана. За нас проблематичен беше и приемот, како и во поголемиот дел од вчерашниот меч со Турција којшто го загубивме со 3:1, па селекторот Никола Матијашевиќ треба да најде инстант решение за овој елемент на играта. Во таков случај, нашите одбојкари ќе ја остварат првичната цел на турнирот, а тоа е да стигнат до две победи со шест бода против Босна и Херцеговина, а потоа в сабота да се обидат да најдат начин да освојат што повеќе поени, сетови, бодови или, пак, да триумфираат против Турција, а со тоа да имаат најдобар можен ефект доколку завршат на второто место во групата.

 

„Ние немаме друг избор освен да победиме против Босна и Херцеговина, а потоа да се бориме за секој поен против Турција. Убеден сум дека имаме капацитет да го подобриме приемот, а доколку го сториме тоа, се ќе биде поинаку“, убеден е организаторот на нашата игра Ѓорѓи Ѓорѓиев.

 

На половина од квалификацискиот турнир во арената „Борис Трајковски“, Турција е прва со две победи и со шест бода, македонскито одбојкари имаат биланс 1-1, а Босна и Херцеговина е на третото место без победа и без бод досега. Тоа значи дека доколку ние триумфираме денеска, ќе го обезбедиме второто место и ќе влеземе во најтесна трка за место во елитното европско друштво. Во него, покрај првопласираните, ќе влезат и петте најдобри второпласирани селекции од седумте квалификациски групи.

 

Но, првиот чекор е победа денеска против Босна и Херцеговина. Преносот е од 17 и 30 на МТВ-1 и на МТВ-3.

Македонските одбојкари загубија од Турција со 3:1 (16:25, 25:18, 18:25, 12:25)

 

Македонските одбојкари го загубија натпреварот со Турција со 3:1 во третото коло на квалификацискиот турнир во Скопје за пласман на Европското првенство во септември. Повторно имаше позитивни моменти, како блесокот во вториот сет, но и драстични падови во играта коишто можат скапо да го чинат црвено-жолтиот тим.

 

Отворивме лошо, со целосна деконцентрација, па во првиот сет не бевме конкурентни, а примачот Субаши направи разлика со сервис за убедливи 25:16. Потоа како да истрча нова репрезентација во арената „Борис Трајковски“, па нашиот напад предводен од Никола Ѓорѓиев, од Љафтов и од Милев направи пресврт и во вториот сет имавме целосна контрола на резултатот. Проработе и пасивниот блок, имавме контри и израмнивме со 25:18. Но не успеавме да се задржиме на потребното ниво, го загубивме приемот, противничкиот техничар Екши направи серија од четири аса на почетокот на третиот сет и веќе немавме нормална реакција на теренот, а пропуштвме и блок на Ѓорѓи Ѓорѓиев за контра за израмнување на 7-7. Оттогаш играа само Турците и го останаа на врвот на табелата во групата.

 

Кај нас, капитенот Никола Ѓорѓиев заврши со 18 поени, Александар Љафтов со 14, а Владо Милев беше стандарден со 10. Противничкиот коректор Адис Лагумџија освои 17 поени, го следеше Субаши со 14, а одлично издание имаше и блокерот Саваш со 13.

 

Со оглед дека и второто место може да обезбеди пласман на континенталниот самит, утре ни е потребна максимална победа со 3:0 над Босна и Херцеговина, а потоа уште некој сет, бод или победа над Турција в сабота за да ги зголемиме надежите за второ учество на европските првенства.

Натпревар за голем чекор кон ЕП, македонските одбојкари денеска против Турција (МТВ-1 и МТВ-3 од 17.30)

 

Ден за дерби на скопскиот квалификациски турнир за пласман на Европското првенство во септевмри. Македонските одбојкари ќе играат против првиот фаворит Турција во дуелот на двата непоразени национални тима коишто досега го исполнија планот со победа над Босна и Херцеговна. За нас ова ќе биде натпревар на сеќавања на триумфите во групната фаза на Европската лига во 2014-та, но и на поразот на последниот континентален самит во Љубљана, кога Турците славеа во три сета.

 

Тренерите и играчите се познаваат одлично, така што тактичките изненадувања се малку веројатни иако не се исклучени. Тогаш, што би можело да реши? Можеби мотивацијата. Македонската репрезентација беше на чекор во осминафиналето на евро-собирот, но Турција освои само два сета против Финска, потоа загуби, па црвено-жолтите не отпатуваа за историски натпревар со Франција во Нант. Без оглед на тоа, 17-тото место во дебитантскиот настап имаше историска димензија и создаде доза притисок дека европските шампионати треба да бидат постојана дестинација за македонските одбојкари. Турците отидоа чекор подалеку, но претрпеа пораз од Италија и завршија 12-ти во конечното рангирање.

 

„Турција е силен тим, има голем потенцијал, но мислам дека не е непобедлива. Ако ние одиграме многу подобро отколку против Босна и Херцеговина, тогаш може да сметаме дека ќе му парираме на фаворитот. Посакувам да почнеме добро, тогаш ќе имаме стабилност и ќе носиме правилни одлуки на теренот“, “, вели македонскиот капитен Никола Ѓорѓиев, кој беше дел од репрезентацијата и во триумфалните изданија против Турција во истата арена на 21-ти и на 22-ви јуни 2014. Два меча завршија со победи за нас (3-0 и 3-1).

 

Првата ѕвезда на турскиот тим, коректорот Адис Лагумџија, тогаш беше тинејџер и не играше во националниот дрес, но на 13.септември 2019-та, во „Стожице“ во Љубљана освои 19 поени против македонскиот тим.

 

„Ние почнавме добро против Босна и Херцеговина. Треба да направиме само една корекција, а тоа е сервисот. Вчера многу грешевме, а доколку го подобриме тој елемент, мислам дека ќе ја забележиме втората победа на турнирот“, убеден е Лагумџија. Отука, клучот за наш успех денеска ќе биде да играме одлична одбрана против него, да ги запреме сервисите на примачот Субаши, кој не беше дел од турската селекција на последното Европско првенство, како и да го нападнеме нивниот прием за да дадеме шанса на нашиот блок. Со еден збор, треба да функционираат сите елементи.

 

Можеби звучи компликувано, но е можно! Секој поен, сет, бод и конечно победа ќе значат голем чекор кон крајната цел. Затоа веруваме и навиваме! Напред Македонија!