Category: Домашно првенство

Вардарки го добија дербито и ќе одат на зимска пауза со максимален ефект

 

Одбојкарките на Вардар жени 2019 славеа над Јанта волеј Кисела вода со 3:0 (25:19, 25:22 и 25:21) во дербито на двете непоразени екипи до меѓусебниот дуел од второто коло во елитната Втора фаза -1 во женскиот македонски одбојкарски шампионат. Црвено-црните грешеа помалку, имаа помоќен напад, а поефикасниот директен блок на ривалките го надополнија со подобар сервис, па во сите три сета беа за нијанса напред и ја задржаа концентрацијата во решавачките периоди. Кубанката Агуеро беше најефикасна со 18 поени, сите од напад, а одлична поддршка и беа Славкова со осум (шест од напад и по еден блок и ас), како и Георгиевска со седум (пет од напад и два аса). Кај Јанта волеј Кисела вода, Проковиќ беше двоцифрена со десет поени (седум од напад, два блока и еден ас), а по осум поени заработија Серафимова (сите од акција) и Маројевиќ (седум од напад и еден ас), но тоа не беше доволно да го спречат првиот сезонски пораз.

 

Во паузата до февруари кога дамите ќе продолжат да се натпреваруваат за првите четири позиции во Втората фаза – 1, а со тоа и за полуфиналето во разигрувањето, Вардар ќе ужива на првото место со максимални осум победи без загубен сет, а Јанта волеј Кисела вода ќе одмора како третопласиран со биланс 7-1. Идентичен настап досега имаше и составот на Работнички Скопје, но освои три бода повеќе, така што ќе биде најблиску до водечкиот тим во Првата лига – Вардар жени 2019.

Време за дерби на непоразените, Јанта волеј Кисела вода – Вардар жени 2019, на МРТ-3 од 17 и 25

 

Работнички Скопје привремено го презеде врвот, Струмица напредуваше на четвртата позиција, Наковски волеј и Универзитет во Тетово претрпеа домашни порази во директните соочувања за исчекор на табелата, а во нејзиниот втор дел, Јанта волеј Форца ги искористи петте сета во Битола и се искачи на водечкото место. Тоа е содржината на второто коло во Втората фаза во македонскиот женски одбојкарски шампионат, во којшто најдоброто допрва претстои, а тоа е дербито на единствените непоразени екипи досега. Јанта волеј Кисела вода ќе го пречека составот на Вардар жени 2019, којшто не загуби сет, па во натпреварот ќе влезе од подобра почетна позиција. Но, без разлика што има два бода помалку, затоа што еднаш славеше со 3:2, а притоа на противниците им препушти вкупно пет сета, со евентуална победа, тимот на Јанта волеј Форца ќе замине на зимска пауза како водечки во елитната Втора фаза -1, а со тоа и целосно во Првата лига. Се разбира дека тоа важи и за вардарки, а од епилогот во салата на ОУ „Невена Георгиева Дуња“ зависи дали Работнички Скопје ќе биде на второто или на третото место. Последните освојувачки на двојната круна во саботата се радуваа на теренот на Наковски волеј и го почувствуваа задоволството што го носи првото место на табелата. Наковски забележа два пораза во Втората фаза -1, па сега е петтопласиран, а пред него е и екипата на Струмица жени којашто има пет триумфи, последниот и исклучително значаен на теренот на Универзитет во Тетово. Со два пораза по ред, тетовки заостанаа многу во однос на скопското трио и тешко е да се верува дека ќе може да се вмешаат во трката за највисок пласман.

 

Во Втората фаза -2, исклучително интересен меч одиграа Пелистер волеј и Фит фан волеј. Откако дебитантките во лигата поведоа со 2:0, битолчанки израмнија, а во скратениот сет, скопскиот тим беше поконцентриран и забележа значајна победа, петта сезонава. Исто толку има и Јанта волеј Форца, но поради бод повеќе од конкурентот, ќе презими на првото место во ова друштво, што одговара на седмото во конечното рангирање за сезоната 2020/21. Јанта волеј Форца во ова коло славеше во Струмица кај Македонија Макс со 3:1, УГД Студент жени ја искористи кризата на Виктори волеј за триумф со 3:0, со којшто, сепак, не успеа да ги мине струмичанки и да направи скок на табелата. Шанса за тоа ќе има Ускана доколку в среда се радува на теренот на Бами Кор во последната средба пред зимската пауза во Првата лига.

 

Прва лига (жени), Втора фаза -1, (2.коло)

Јанта волеј КВ – Вардар жени (денеска, 17.30, пренос на МРТ-3)


Наковски волеј – Работнички Скопје 1:3 (21:25, 19:25, 25:22, 21:25)


Универзитет во Тетово – Струмица жени 0:3 (20:25, 21:25, 18:25)

 

Прва лига (жени), Втора фаза -2, (2.коло)

Пелистер волеј – Фит фан волеј 2:3 (19:25, 24:26, 25:22, 25:23, 12:15)


Македонија Макс – Јанта волеј Форца 1:3 (11:25, 19:25, 25:21, 23:25)


УГД Студент жени – Виктори волеј 3:0 (26:24, 25:18, 25:15)


Бами Кор – Ускана (среда, 19.00)

Очекувани резултати кај одбојкарите во последното коло од есенскиот дел од шампионатот

 

Откако Вардар славеше над Универзитет во Тетово во средата во дербито од воведот во Втората фаза -1 во машкото македонско одбојкарско првенство, немаше изнендувања, ниту, пак, беше тешко да се прогнозираат резултатите од другите натпревари пред зимската пауза во Првата лига. Џио Струмица се радуваше над ГОК Борец вторпат сезонава, сега во својата сала со 3:0, со што последниот освојувач на двојната круна го заокружи перфектниот настап досега. Струмичани имаат макимален број победи (10) и бодови (30), а Вардар е единствен којшто успеа да освои сет протв нив. Црвено-црните се третопласирани поради полош сет-количник од Универзитет во Тетово, а ГОК Борец направи голем резултат со настапот во главниот натпреварувачки сегмент, но според сите објективни параметри, тешко е да се верува дека ќе може да им ги помати сметките на фаворитите за титулата.

 

Во Втората фаза -2, Шкендија одигра лесно против Дибра волеј и со шест победи ќе го чека продолжението на сезоната. Првото место во ова друштво ќе значи вкупно петто во конечното рангирање за 2020/21. Барем засега, единствен којшто може да ја предизвика Шкендија е составот на Штип УГД Штип со пет триуумфи, последниот, а втор по ред беше против Јанта волеј. Лирија забележа четири победи за трета позиција во оваа конкуренција, а во саботата тимот од Жеровјане уште еднаш го искористи домашниот терен против Весна Пробиштип. Зелено-црните се вкупно осми со два триумфа, Јанта волеј има еден, а на дното е Дибра волеј без ниту освоен сет досега.

 

Со натпреварите од првото коло во Втората фаза заврши есенскиот дел од лигата, а наредниот период ќе биде репрезентативен. Макеонскиот национален тим ќе се подготвува за јануарските квалификации за Европското првенство во 2021-ва, а првенството ќе продолжи во февруари и според првичниот календар, би требало да заврши до крајот на април.

Прва лига (мажи), Втора фаза-1, (1.коло)

Универзитет во Тетово – Вардар 1:3 (20:25, 25:21, 21:25, 19:25)


Џио Струмица – ГОК Борец 3:0 (25:15, 25:20, 25:17)

Прва лига (мажи), Втора фаза-2, (1.коло)

Шкендија – Дибра волеј 3:0 (25:13, 25:15, 25:17)


Штип УГД Штип – Јанта волеј 3:0 (25:12, 25:21, 25:14)


Лирија – Весна Пробиштип 3:0 (25:21, 25:23, 25:7)

Соочување на непоразените, значајни пресметки на директните конкурентки за подобар пласман

 

Големо дерби и два натпревара за пласман меѓу првите четири екипи, како и директен дуел за врвот во понеквалитетниот сегмент од Првата лига (жени). Тоа е понудата за второто коло во Втората фаза коешто ќе ја отстрани дилемата за водечката позиција пред зимската пауза. В понеделник од 17 часот и 30 минути, пред камерите на МРТ, досега непоразените Јанта волеј Кисела вода и Вардар жени ќе играат за осмата победа сезонава. Црвено-црните не загубија ниту еден сет на претходните седум настапи, па во дербито ќе влезат од челното место на табелата, а Јанта волеј КВ еднаш победи со 3:1, еднаш со 3:2, па во однос на ривалот има два бода помалку и полош сет-количник. Но без оглед на тоа, успех во меѓусебното соочување ќе значи прво место за одбојкарките од Кисела вода.

 

На третото засега е Работнички Скопје, кој во случај на триумф на гостувањето кај Наковски волеј може да напредува за една позиција, а притоа ќе направи голема предност во однос на утрешниот противник. Оттука, одбојкарките на Наковски волеј се под поголем притисок да го добијат овој меч, затоа што со евентуален пораз ќе имаат заостанување од дури три победи зад Работнички Скопје и зад поразениот од дербито. Тоа важи и за Универзитет во Тетово и за Струмица жени, кои исто така, имаат по четири победи во досегашниот тек од сезоната, па поразениот во нивната утрешна средба значително ќе го загуби чекорот во однос на водечкото трио, но победникот може да презими на четвртото место.

 

Во Втората фаза -2, исто така, има дерби на водечките екипи. Пелистер волеј и Фит фан волеј се радуваа четирипати на седум настапи, па поуспешниот во Битола утре ќе има шанса да биде лидер во овој натпреварувачки сегмент иако сериозен претендент за првото место е и Јанта волеј Форца. Скопската екипа ќе истрча на теренот на Македонија Макс, а со оглед дека има ист број победи и бодови како Пелистер волеј и Фит фан волеј, во зависност од резултатот од Битола, може да го освои првото место. На другите два натпревара коишто засега не можат да влијаат на водечката тројка, Виктори волеј ќе оди кај УГД Студент жени, а Бами Кор и Ускана се договорија да играат в среда.

 

Прва лига (жени), Втора фаза -1, (2.коло)

Јанта волеј КВ – Вардар жени (понеделник, 17.30, пренос на МРТ-3)


Наковски волеј – Работнички Скопје (сабота, 18.00)


Универзитет во Тетово – Струмица жени (сабота, 18.00)

Прва лига (жени), Втора фаза -2, (2.коло)

Пелистер волеј – Фит фан волеј (сабота, 15.30)


Македонија Макс – Јанта волеј Форца (сабота, 18.30)


УГД Студент жени – Виктори волеј (сабота, 17.30)


Бами Кор – Ускана (16.декември, 19.00)

Навидум лесно коло за прогноза за крај на есенскиот дел од календарот во Првата лига (мажи)

 

Пред собирот на македонските репрезентативци за почеток на тренажниот процес за настап во јануарските квалификации за Европското првенство 2021, на домашната сцена ќе заврши воведното коло од Втората фаза -1 во најсилната машка лига, во коешто во дербито во средата Вардар славеше над Универзитет во Тетово на гостински терен. Без оглед што му вратија на ривалот за поразот во првиот меѓусебен дуел сезонава во октомври, црвено-црните останаа третопласирани, но во случајов поради еден загубен сет повеќе во вкупниот биланс. Двете екипи имаат по осум победи и по 24 бода, па на паузата во првенството, за нијанса подобриот сет-количник ќе ги одржи тетовци веднаш зад водечката Џио Струмица. Последниот освојувач на двојната круна кај нас и се уште актуелен бранител на двата трофеја досега има максимален ефект, а важи за голем фаворит и во денешната пресметка со ГОК Борец. Велешани успеаја да влезат во елитното друштво што е голем успех, но во оваа конкуренција тешко дека ќе можат да парираат.

 

Неизвесност не би требало да има и во натпреварите од Втората фаза -2 во којашто шест екипи ќе одиграат вкупно десет кола за да го одлучат конечниот пласман на крајот на сезоната 2020/21. Шкендија денеска ќе го пречека составот на Дибра волеј којшто досега не освои ниту еден сет, па тетовци веќе можат да го бројат шестиот првенствен триумф. Штип УГД Штип засега има четири, но може да го подобри билансот доколку го повртори резултатот од минатиот викенд против Јанта волеј, исто така во својата сала. Во добар ритам влезе и Лирија, забележа три победи, последната против Весна Пробиштип, истиот противник којшто утре повторно ќе гостува во салата на ОУ „Гоце Делчев“ во Тетово. Во случај да загубат, пробиштипјани ќе имаат заостанување од две победи во однос на Лирија.

 

Прва лига (мажи), Втора фаза-1, (1.коло)

Универзитет во Тетово – Вардар 1:3 (20:25, 25:21, 21:25, 19:25)


Џио Струмица – ГОК Борец (петок, 19.30)

Прва лига (мажи), Втора фаза-2, (1.коло)

Шкендија – Дибра волеј (петок, 18.00)


Штип УГД Штип – Јанта волеј (сабота, 14.00)


Лирија – Весна Пробиштип (сабота, 19.30)

Вардар му се реваншираше на Универзитет во Тетово

 

Вардар го доби дербито со Универзитет во Тетово на гости со 3:1 (25:20, 21:25, 25:21, 25:19) и победнички ја отвори Втората фаза -1 во најсилната машка одбојкарска конкуренција кај нас. За разлика од првиот дуел во Скопје во октомври, црвено-црните денеска одиграа подобро и се изедначија со ривалот според бројот на триумфи (8) и според бодовите (24), но сепак тетовци останаа на второто место затоа што имаат за нијанса подобар сет-количник.

 

Водечкиот состав на Џио Струмица, којшто има максимален ефект (9-0) досега, претстојниот викенд ќе игра со четвртопласираниот ГОК Борец, а за тогаш се предвидени и другите средби од почетното коло во овој натпреварувачки сегмент.

Дерби во Тетово за почеток на Втората фаза кај одбојкарите

 

Универзитет во Тетово и Вардар денеска од 19 часот ќе го повлечат првиот потег во Втората фаза -1 од македонскиот машки одбојкарски шампионат. Откако претходната ја завршија со пораз од Џио Струмица пред два дена и го расипаа дотогашниот максимален ефект, тетовци ќе се обидат вторпат сезонава да слатат над ривалот, а со тоа да направат предност од два трумфа и да ја одбранат втората позиција на табелата. Црвено-црните, пак, остварија седум успеси на девет меча, а беа поразени токму во дерби средбите против Џио Струмица и против Универзитет, кој на 26-ти октомври во „Кале“ се радуваше со 3:0 (25:19, 25:22, 25:21).

 

Другите натптревари од воведното коло во Втората фаза се закажани претстојниот викенд, а во елитниот дел Џио Струмица ќе го пречека ГОК Борец со амбиција да дојде до десет победи на десет настапи. Во сегментот за конечен пласман од петтото до десеттото место, Шкендија ќе игра со Дибра волеј, а две двојки се исти како и минатата сабота, Штип УГД Штип – Јанта волеј и Лирија – Весна Пробиштип.

 

Кај дамите, во второто коло од Втората фаза -1, дербито е меѓу двата непоразени состава досега, Вардар жени и Јанта волеј Кисела вода, Наковски волеј ќе го пречека Работнички Скопје, а Универзитет во Тетово ќе ги предизвика одбојкарките на Струмица жени. Во Втората фаза -2, Пелистер волеј ќе се надмудрува со Фит фан волеј, УГД Студент жени ќе сервира против Виктори волеј, Бами Кор со Ускана и Македонија Макс ќе се бори за бодовите со Јанта волеј Форца.

Дербито и врвот за Џио Струмица

 

Џио Струмица славеше над Универзитет во Тетово со 3:0 (25:23, 25:22 и 25:22) во дербито на досегашниот дел од сезоната во најквалитетната македонска одбојкарска конкуренција. Тоа значи дека последниот освојувач на двојната круна кај нас го задржа максималниот ефект досега и ќе заврши на врвот на табелата по воведниот дел од Првата лига (мажи). Тетовци беа рамноправен ривал, но во првиот сет пропуштија предност од три поени и потоа не можеа да го запрат противникот којшто постојано за нијанса беше пред нив.

 

Со девет победи на девет натпревари, Џио Струмица ќе влезе во Втората фаза – 1, во којашто во четири круга со вкупно 12 натпревари ќе играат и Универзитет во Тетово, Вардар и ГОК Борец. Универзитет има осум, Вардар седум, а велешани шест триумфи во друштвото на екипите со веќе обезбеден полуфинален статус. Натпреварите од наредниот сегмент продолжуваат претстојниот викенд, а потоа ќе има пауза поради подготовките на македонската репрезентација за настапот во јануарските квалификации за Европското првенство наредната година.

Прво коло, втора фаза, три екипи се издвоија во двата натпреварувачки сегмента кај дамите

 

Шест домашни и една гостинска победа содржеше почетокот на Втората фаза во женскиот македонски одбојкарски шампионат. Во елитниот дел славеа екипите коишто имаа најдобар ефект во воведната етапа од сезоната и на тој начин уште повеќе ја зголемија предноста во трката за полуфинале. Вардарки останаа на чело на табелата откако лесно го совладаа Универзитет во Тетово со само 30 загубени поени. Тоа значи дека имаат максимални седум победи, исто како и одбојкарките на Јанта волеј Кисела вода, но досега освоија два бода повеќе, со напомена дека по оваа рунда е зголемена и разликата во поглед на сет-количникот. Тимот од Кисела вода загуби сет на домашен терен од Наковски волеј, но сепак ја заврши работата, па во меѓусебните дуели со Вардар жени и со Работнички Скопје ќе одлучува за пласманот во Втората фаза -1. Последниот освојувач на двојната круна кај нас се радуваше во пресметката со Струмица жени со 3:0, но по голема битка што е видливо од резултатот во сетовите. Работнички Скопје има шест триумфи досега, еден помалку од водечките екипи, но солидни две повеќе од струмичките тимови и од Универзитет во Тетово.

 

Во таканаречената Втора фаза -2 во којашто осум екпи играат за конечен пласман во сезоната 2020/21, Пелистер волеј ја задржа првата позиција пред Фит фан волеј поради тоа што има подобар поен-количник. Битолчанки беа поуспешни од Бами Кор, а дебитантот во лигата од староседелецот Македонија Макс. Четири победи има и составот на Јанта волеј Форца којшто славеше над УГД Студент жени со 3:0, но во во овој првенствен дел влезе со еден загубен сет повеќе од конкурентките, па затоа остана третопласиран. Значајна победа забележа и Ускана во Струмица кај Виктори волеј, но не успеа да го мине противникот на четвртото место. Од шестото до осмото се УГД Студент жени со една и Македонија Макс и Бами Кор без ниту една победа.

 

Прва лига (жени), Втора фаза -1, (1.коло)
Вардар жени – Универзитет во Тетово 3:0 (25:7, 25:12, 25:11)
Работнички Скопје – Струмица жени 3:0 (28:26, 25:23, 25:20)
Јанта волеј Кисела вода – Наковски волеј 3:1 (16:25, 25:18, 25:18, 25:19)

 

Прва лига (жени), Втора фаза -2, (1.коло)
Фит фан волеј – Македонија Макс 3:0 (25:12, 25:19, 25:19)
Пелистер волеј – Бами Кор 3:0 (25:11, 25:22, 25:3)
Виктори волеј – Ускана 0:3 (11:25, 20:25, 23:25)
Јанта волеј Форца – УГД Студент жени 3:0 (25:19, 25:23, 25:15)

Ден за најголемото дерби, Џио Струмица-Универзитет во Тетово на МРТ-3, ГОК Борец меѓу четирите најдобри

 

Фаворитите на победничка, аутсајдерите на поразена страна, ГОК Борец се пласираше во Втората фаза -1, Универзитет во Тетово го загуби првиот сет сезонава, па Џио Струмица се врати на врвот во Првата лига (мажи) во пресрет на најголемото дерби досега во сезоната. Тоа се карактеристиките и последиците на осмото коло во најсилната македонска одбојкарска конкуренција пред натпреварот во салата „Парк“ во којшто ќе сервираат двете најдобри екипи со идентичен број победи, по осум, со идентичен број бодови, по 24, со идентичен сет-количник (24-1), а единствено со различен однос на освоени и на загубени поени. Токму поради тој параметар, Џио Струмица во дербито ќе влезе од првата, а тетовци од втората позиција на табелата. Преносот е на МРТ-3 каналот од 17 часот и 25 минути, а следејќи го може да се разјаснат неколку прашања: кој ќе биде прв по овој натпреварувачки сегмент, со оглед дека оваа пресметка е последна од неа, а е во рамки на осмото коло, како и тоа дали освојувачот на двојната круна кај нас ќе ја продолжи доминацијата во меѓусебните дуели. Во последните две сезони, Џио Струмица има четири триумфи на четири средби од коишто три беа на гостински терен. Но ова е се поинакви околности, Универзитет ги потврди големите амбиции со триумф над Вардар со 3:0 во Скопје, а соочувањето со струмичани ќе биде уште една шанса за нивно остварување. Двата тима досега немаа вистинска можност за тест на сопствениот квалитет на домашната сцена и дербито е значајно и од тој аспект, зашто може да даде пореална слика за подготвеноста на македонските репрезентативци пред јануарските квалификации за Еввопското првенство во 2021.

 

За разлика од дилемата за врвот којашто беше јасна уште пред неколку недели, битката за четвртото, последно место за учество во Втората фаза -1 траеше се до минатиот викенд, односно до завршното коло од првата натпреварувачка етапа. Шкендија, сепак, немаше сили во градскиот меч со Универзитет во Тетово, па иако го доби првиот сет, претрпе пораз и не успеа да го достигне ефектот ГОК Борец. Велешани загубија кај Вардар со 3:0, но претходно се радуваа на шест победи, една повеќе од Шкендија, а со тоа ја заслужија привилегијата да бидат во друштво на Џио Струмица, на Универзитет во Тетово и на Вардар. Овие четири екипи ќе вкрстат и во полуфиналето од разигрувањето, но претходно ќе одиграат четирикружно во Втората фаза -1, вкупно 12 кола, секој со секого дома и на гости по двапати, а на тој начин ќе одредат кој од која позиција ќе почне во елиминацискиот дел.

 

Другите ќе играат во Втората фаза -2 двокружно, значи десет кола секој со секого дома и на гости по еднаш и ќе го одредат конечниот пласман за тековната сезона. Во оваа конкуренција, Шкендија ќе почне со пет победи, Штип УГД Штип со четири откако викендов славеше над Јанта волеј со 3:0, додека, пак, Лирија има три триумфи, последниот во саботата против Весна Пробиштип, исто така со 3:0. Јанта волеј е претпоследен со една победа, а Дибра волеј којашто вчера играше со Џио Струмица и освои 34 поени, засега нема ниту освоен сет.

 

Прва лига (мажи), 9.коло
Вардар – ГОК Борец 3:0 (25:19, 25:19, 25:18)
Универзитет во Тетово – Шкендија 3:1 (26:28, 25:18, 25:18, 25:18)
Штип УГД Штип – Јанта волеј 3:0 (25:20, 25:18, 25:17)
Лирија – Весна Пробиштип 3:0 (25:20, 25:17, 25:12)
Дибра волеј – Џио Струмица 0:3 (14:25, 11:25, 9:25)

Прва лига (мажи), 8.коло
Џио Струмица – Универзитет во Тетово (денеска, 17.30, пренос МРТ 3)