По препораките и забраните изречени од Комисијата за заразни болести и
Министерството за здравство а усвоени од Владата како дополнување на мерките за
превенција и за справување со заканата од корона вирусот, Одбојкарската федерација
реши да ги прекине натпреварите во сите првенствени и куп конкуренции на неодредено
време! Тоа значи дека викендов нема да бидат одиграни натпреварите од петтото коло во
Втората фаза во сениорските лиги, ниту, пак, оние во помладите категории. Во зависност
од настаните и препораките на надлежните институции, ОФМ ќе донесе соодветна одлука
за тоа кога ќе продолжи одбојкарската сезона и со каков ритам.

 

Вардарки се во серија од 11 победи и не го пуштаат врвот во нашата најквалитетна женска одбојкарска лига. Во дербито на четвртото коло од Втората фаза-1, црвено-црните славеа над Наковски волеј со 3:2 и со само еден сезонски пораз ја задржаа предноста во однос на екипата на Работнички Скопје којашто ја искористи домашната поддршка за триумф над Струмица жени со 3:0. Ова значи дека скопските ривали се издвоија во трката за првото место, а со тоа и за подобра почетна позиција во полуфиналето од разигрувањето. Вардар жени и сега има победа повеќе, но со оглед дека му препушти два сета на Наковски волеј, загуби еден бод од предноста во однос на актуелните првенки од Работнички Скопје. Со низа од пет порази на последните седум лигашки средби, Наковски волеј веќе не е сигурен во обидот да влезе во нокаут сегментот од сезоната, затоа што во пресрет на наредното коло има ист број победи како Струмица жени и како Јанта волеј Форца, со напомена дека се наоѓа на третото место поради поголем број освооени бодови. Од истата причина Струмица жени е пред тимот на Јанта волеј Форца којшто во саботата се радуваше во салата на Виктори волеј со 3:0.

 

Во понеквалитетниот натпреварувачки сегмент, УГД Студент жени дома го совлада Уноверзитет во Тетово со 3:1 и го задржа максималниот биланс по зимската пауза. Штипјанки се првопласирани во Втората фаза-2 со две победи повеќе од Ускана којашто во саботата очекувано не загуби сет на гостувањето кај последнопласираниот Бами Кор. Пелистер волеј и Македонија Макс ќе играат в среда, а во пресрет на нивниот дуел заостануваат два трумфа зад Ускана. Со ист биланс како битолчанки и струмичанки е и Универзитет во Тетово.

 

Прва лига (жени), Втора фаза-1, 4.коло

Вардар жени – Наковски волеј 3:2 (17:25, 25:14, 25:16, 18:25, 15:10)
Работнички Скопје – Струмица жени 3:0 (25:18, 25:12, 25:20)
Виктори волеј – Јанта волеј Форца 0:3 (19:25, 14:25, 7:25)

Прва лига (жени), Втора фаза-2, 4.коло

УГД Студент жени – Универзитет во Тетово 3:1 (25:16, 22:25, 25:23, 25:16)
Бами Кор – Ускана 0:3 (16:25, 8:25, 21:25)
Пелистер волеј – Македонија Макс (11.март)

 

Одбојкарите на Универзитет во Тетово триумфираа над Вардар во дербито на четвртото коло од Втората фаза-1 во најквалитетната македонска одбојкарска конкуренција. Првиот сезонски пораз на водечката екипа значи дека битката за првото место добива дополнителен шарм затоа што водечкото трио во коешто е и Џио Струмица до почетокот на полуфиналето ќе одигра уште четири натпревари. Во нив црвено-црните од Скопје ќе влезат со 11 победи, една повеќе од актуелниот првак и две во однос на тетовскиот ривал, но тоа не им гарантира дека во разигрувањето ќе тргнат од најдобрата позиција.

 

Саботното дерби во малата сала на СРЦ „Кале“ почна со доминација на Универзитет во блокот против коректорот на Вардар Јовица Симовски. Гостите освоија осум поени од блок во таа фаза и поведоа, но во наредните два сета домашниот состав имаше подобар напад и драстично подобар сервис, па лесно поведе со 2:1. Сепак, тоа не беше доволно за да го задржи стопроцентниот ефект сезонава, затоа што тетовци го издржаа притисокот во четвртиот сет, грешеа помалку, израмнија, а потоа и доминираа во решавачкиот со 12 наспроти само 5 освоени директни поени на Вардар. Со серија од пет победи, Универзитет во Тетово во наредното коло ќе го пречека составот на Џио Струмица во уште едно големо дерби во нашата одбојка. Бранитеот на двојната круна немаше проблеми против Лирија на свој терен и очекувано славеше со 3:0 без да се потроши, но тимот од Жеровјане се уште е безбеден на четвртото место на табелата коешто обезбедува настап во разигрувањето затоа што Весна Пробиштип го совлада Штип УГД Штип со 3:0. По локалото дерби, двете екипи имаат заостанување од три победи во однос на Лирија.

• 

• 

• 

• 

• 

• 

• 

• 

• 

 

Со оглед дека претходно имаше одложен натпревар, во Втората фаза-2 викендов беа одиграни два меча, двата во Дебар со пораз на домашниот состав на Дибра волеј. Во саботата од ГОК Борец со 3:0, а во неделата од Шкендија со 3:1. Тоа значи дека велешани се први во оваа конкуренција со една победа повеќе од Шкендија.

 

Прва лига (мажи), Втора фаза-1, 4.коло

Џио Струмица – Лирија 3:0 (25:16, 25:16, 25.19))
Вардар – Универзитет во Тетово 2:3 (23:25, 25:16, 25:15, 22:25, 11:15)
Весна Пробиштип – Штип УГД Штип 3:1 (16:25, 25:20, 25:21, 25:23)

Прва лига (мажи), Втора фаза-2, 4/3.коло

Дибра волеј – ГОК Борец 0:3 (18:25, 11:25, 16:25)
Дибра волеј – Шкендија 1:3 (25.19, 21:25, 14:25, 15:25)

 

Одбојкарките на Вардар ќе го пречекаат Наковски волеј во дербито на четвртото коло од Втората фаза-1 во најквалитетното женско одбојкарско друштво. Во малата сала на СРЦ „Кале“, црвено-црните ќе играат за 14-тата победа сезонава иако и без неа секако ќе го задржат првото место на табелата. Наковски волеј е во лоша резултатска серија, но се уште е во водечкото трио затоа што има поголем број бодови од Струмица жени, но доколку сака да остане во трка за второто место, треба да се обиде да влезе во низа, а тоа претпоставува и да победува против подобропласираните екипи. Во случај на пораз, а триумф на Струмица жени на гостувањето кај Работнички Скопје, може да се случи Наковски волеј да го загуби третото место. Доколку тимовите од главниот град ја искористат предноста на домашниот терен во пресметките со струмичките ривалки, тогаш ќе создадат значајна предност и ќе останат сами во битката за првото место на табелата по основниот тек од сезоната.

 

Сметките на водечките четири сака да ги расипе Јанта волеј Форца, петтата екипа којашто со право може да се надева на пласман во разигрувањето. Составот од Кисела вода има девет победи, една помалку од Наковски волеј и од Струмица жени, но доколку одигра со успех во салата на Виктори волеј, може да се надева дека ќе се изедначи со конкурентите за настап во нокаут сегментот. Сепак, дури и доколку сите резултати од оваа рунда им одат во прилог, одбојкарките на Јанта волеј Форца нема да напредуваат на табелата поради тоа што немаат доволен број бодови. Виктори волеј, пак, е во лоша низа, досега заработи само шест победи, така што има само теоретски шанси за учество во разигрувањето.

 

Во Втората фаза-2, во којашто екипите играат за пласман од 7-то до 12-тото место во конечното рангирање, УГД Студент жени ќе се сретне со Универзитет во Тетово со амбиција да ја впише осмата победа и да го зацврсти водечкото место. Со четири триумфи досега, тетовки се во друштво на Пелистер волеј и на Македонија Макс коишто во рамки на ова коло ќе играат в среда. Второпласираната Ускана е голем фаворит на теренот на Бами Кор, но дури и со планирана шеста победа, кичевки не се во позиција да го загрозат ефектот на УГД Студент.

 

Прва лига (жени), Втора фаза-1, 4.коло

Вардар жени – Наковски волеј (сабота, 18.30)
Работнички Скопје – Струмица жени (сабота, 19.00)
Виктори волеј – Јанта волеј Форца (сабота, 16.00)

Прва лига (жени), Втора фаза-2, 4.коло

УГД Студент жени – Универзитет во Тетово (сабота, 17.00)
Бами Кор – Ускана (сабота, 17.00)
Пелистер волеј – Македонија Макс (11.март)

 

Четвртото коло во најсилната машка одбојкарска конкуренција кај нас има тежина на полуфинале во разигрувањето затоа што во него ќе се сретнат првопласираните четири екипи досега. Актуелниот првак, Џио Струмица, ќе ја пречека Лирија, а лидерот Вардар ќе му биде домаќин на Универзитет во Тетово. Бранителите на двојната круна се надеваат дека во салата „Парк“ денеска ќе забележат сигурен успех, а со тоа дека ќе го искористат дербито во Скопје за да му се доближат на Вардар, или пак, да се оддалечат од тетовци за две победи. Во секој случај, доколку составот на Џио Струмица го оствари планираниот 10-ти триумф сезонава, секако ќе профитира по оваа натпреварувачка рунда. Иако има аутсајдерска улога пред соочувањето со шампионот, Лирија може да одигра растоварено бидејќи има сигурна предност од три победи во трката за влез во разигрувањето.

 

Саботната програма го содржи дербито меѓу Вардар и Универзитет во Тетово, екипи коишто досега забележаа три победи во Втората фаза-1. Црвено-црните од Скопје славеа на есенскиот меѓусебен дуел, впрочем главниот претендент за тронот нема пораз сезонава, но за да го обезбеди првото место во основната фаза, потребно е да се радува на утрешниот дуел, но и да освои барем бод на преостанатите две дерби пресметки до крајот на овој сегмент од сезоната. Ланскиот финалист во купот, Универзитет во Тетово, има осум победи, една помалку во однос на Џио Струмица, така што ако сака да напредува на табелата и да оствари предност на домашен терен во полуфиналето од разигрувањето, треба да забележи позитивен ефект во мечевите коишто имаат дерби карактер. Без оглед што не се во горниот дел и само теоретски можат да се најдат во лигашкото полуфинале, со неспорни мотиви за победа ќе играат локалните ривали Весна Пробиштип и Штип УГД Штип.

 

Претстојниот викенд ќе биде раритетен и поради тоа што во него се закажани две средби од Втората фаза-2, двете во Дебар. Најпрво, утре во редовното, четврто коло, Дибра волеј ќе сервира против ГОК Борец, а потоа в недела на теренот на последнопласираната екипа сезонава ќе гостува Шкендија во заостанатиот натпревар од третото коло. Во оваа конкуренција велешани се први со три победи, една повеќе од Шкендија, а Дибра волеј засега нема триумф.

 

Прва лига (мажи), Втора фаза-1, 4.коло

Џио Струмица – Лирија (денеска, 17.30)
Вардар – Универзитет во Тетово (сабота, 16.00)
Весна Пробиштип – Штип УГД Штип (сабота, 17.30)

Прва лига (мажи), Втора фаза-2, 4/3.коло

Дибра волеј – ГОК Борец (сабота, 15.00)
Дибра волеј – Шкендија (недела, 20.00)

 

Бранителките на двојната круна ја продолжија успешната серија против Наковски волеј откако славеа со 3:2 во дербито на третото коло во Втората фаза-1 во нашата најквалитетна женска одбојкарска конкуренција. Во исклучително интересен натпревар во салата “Парк”, по многу пресврти, екипата на Работнички Скопје за нијанса беше поуспешна и се израдува на осмиот триумф едноподруго во меѓусебните дуели со ривалките.

Со исклучок на третиот сет, сите други беа рамноправни, а клучниот поен беше промашувањето на Тасиќ на 9:7 за Наковски волеј во решавачкиот петти сет. По него, Работнички Скопје направи серија од 8:1 и ја забележа 12-тата првенствена победа. За неа најголем придонес имаше Антонија Баталаковска со 27 поени, Стојанова и Стојановска забележаа по 11, а Јонузи 9.

Наковски волеј го претрпе четвртиот пораз во 14-от сезонски лигашки натпревар, а втор во овој натпреварувачки сегмент по којшто и натаму е третопласиран. Ана Фасулева со 23 и засилувањето од Србија Миња Тасиќ со 27 поени не успеаја да го запрат четвртиот пораз на последните шест лигашки натпревари.

 

Одбојкарките на Јанта волеј Форца забележаа исклучително важна победа на гостувањето кај Струмица жени во третото коло од Втората фаза-1 во Првата лига. Иако дебитантот во најсилната конкуренција водеше со 2:0, двократните првенки успеаја да направат целосен пресврт и да се израдуваат на деветтиот првенствен триумф. Со тоа им се доближија на двете струмички екипи на само една победа, што значи дека тимот од Кисела вода остана во трка за четвртото место на табелата коешто обезбедува нстап во полуфиналето од разигрувањето. Составот на Струмица жени ги доби првите два натпревара по зимската пауза и имаше голема шанса да направи тешко достижна предност пред Јанта волеј Форца, а пропушти и можност да се качи на третото место на табелата. На него е Наковски волеј којшто денеска ќе го пречека Работнички Скопје во дербито на колото. Во него ќе сервираат ланските финалисти во купот, а и годинава екипи со амбиција да одат далеку во првенството. Одбојкарките на Работнички Скопје го загубија дербито со Вардар минатиот викенд и го препуштија водечкото место, но притисокот подеднакво ќе биде и на страна на Наковски волеј поради трите порази на последните пет лигашки средби, како и поради елиминацијата во четвртфиналето на купот. Лошата серија на Наковски волеј почна токму со пораз од Работнички Скопје на домашен терен во есенскиот меѓусебен дуел, така што ова соочување е добра шанса за струмичанки да се реваншираат и со тоа да се израмнат со противничките според бројот на победи и на бодови. Сепак, дури и со пораз од 3:0, бранителките на двојната круна ќе останат второпласирани затоа што секако ќе имаат подобар сет-количник од Наковски волеј. Мотивот на скопските одбојкарки ќе биде да се забележи победа за да се одржи чекорот со тимот на Вардар жени, којшто откако претходно го совлада Виктори волеј со 3:0, има 13 победи, две повеќе од шампионките.

Во Втората фаза-2, Ускана го забележа третиот успех, овој пат на гости кај Универзитет во Тетово којшто не успеа да задржи водство од 2:0 во сетови. Кичевки направија комплетен пресврт и со пет победи се на второто место во оваа конкуренција зад тимот на УГД Студент жени. Во пресрет на мечот со Македонија Макс од ова коло, закажан за в четврток, штипјанки се радуваа на шест триумфи, а струмичката екипа забележа четири, исто колку Универзитет во Тетово и Пелистер волеј. Битолчанки ја прекинаа серијата од шест порази откако во саботата дома славеа над последнопласираниот Бами Кор со 3:0, па можат да се надеваат дека ќе се вклучат во битката за врвот во ова друштво, а со тоа да обезбедат подобар пласман на крајот на сезоната.

 

Прва лига (жени), Втора фаза-1, 3.коло

Струмица жени – Јанта волеј Форца 2:3 (25:10, 25:21, 22:25, 20:25, 11:15)
Наковски волеј – Работнички Скопје (денеска, 17.00, пренос на МРТ Собраниски)
Вардар жени – Виктори волеј 3:0 (25:10, 25:14, 25:7)

Прва лига (жени), Втора фаза-2, 3.коло

Универзитет во Тетово – Ускана 2:3 (25:21, 25:22, 22:25, 24.26, 7:15)
Пелистер волеј – Бами Кор 3:0 (25:13, 25:20, 25:17)
Македонија Макс – УГД Студент жени (5.март, 19.00)

 

Фаворитите забележаа очекувани и лесни победи во саботните натпревари во нашето најквалитно машко одбојкарско друштво. Откако го загуби дербито со Вардар, актуелниот првак Џио Струмица немаше проблеми со Весна Пробиштип и го совлада противникот вторпат сезонава, уште еднаш пред своја публика во „Парк“. Бранителот на двојната круна ја оствари деветтата победа, а со тоа ја задржа предноста во однос на третопласираниот Универзитет во Тетово. Ланскиот финалист во купот дома славеше над Штип УГД Штип на свој терен, а со тоа ја продолжи серијата на четири триумфи во низа. Штипјани, пак, претрпеа четири порази едноподруго и имаат значајно, можеби и недостижно заостанување во однос на Лирија во трката за влез во разигрувањето, без оглед што тимот од Жеровјане доживеа три порази на последните четири средби. Последниот го претрпе во Скопје од Вардар кој е единствена екипа со максимален ефект досега и сигурно го чува лидерското место на табелата.

Во Втората фаза-2, во исклучително возбудлив натпревар, ГОК Борец славеше над Шкендија со 3:2 на гостувањето во Тетово. Поранешниот првак ги доби првите два сета, но велешани потоа направија пресврт и со максимални две победи по зимската пауза, ја презедоа првата позиција во овој натпреварувачки сегмент. Ако ја задржат до крајот, тогаш ќе бидат седмопласирани во конечното рангирање за сезоната 2019/2020.

 

Прва лига (мажи), Втора фаза-1, 3.коло

Џио Струмица – Весна Пробиштип 3:0 (25:16, 25:18, 25:15)
Вардар – Лирија 3:0 (25:15, 25:10, 25:17)
Универзитет во Тетово – Штип УГД Штип 3:0 (25:12, 25:13, 25:20)

Прва лига (мажи), Втора фаза-2, 3.коло
Дибра волеј – Шкендија (8.март)

Прва лига (мажи), Втора фаза-2, 2.коло
Шкендија – ГОК Борец 2:3 (26:24, 25:22, 21:25, 23:25, 9:15)

 

Со оглед на состојбата со корона вирусот, Владата на денешната седница донесе препорака спортските натпревари кај нас до 6-ти март да се играат без присуство на публика.

 

Во насока на оваа препорака, натпреварите од третото коло во Втората фаза, како и сите предвидени лигашки и куп натпревари во односниот период, ќе бидат одиграни без присуство на гледачи.

 

Вардарки го обезбедија врвот на табелата, шампионките заостануваат, Наковски волеј е во резултатска криза, Струмица жени има шанса да напредува, а Јанта волеј Форца да се доближи до позиција за настап во разигрувањето. Токму затоа третото коло во Втората фаза-1 во женското одбојкарско првенство е исклучително привлечно. Во него екипата на Вардар жени уште минатиот викенд ја заврши работата против Виктори волеј и сега има две победи повеќе од Работнички Скопје и дури три во однос на Наковски волеј и на Струмица жени. Тоа значи дека без оглед како ќе завршат двата меча во Струмица, црвено-црните ќе останат на лидерското место. Јасно е и дека одбојкарките на Работнички Скопје ќе останат втори, макар што со пораз од Наковски волеј в понеделник, ќе бидат пред ривалките само поради подобар сет-количник. За разлика од лани кога Наковски волеј играше финале во купот, по елиминацијата од Јанта волеј Форца, струмичанки сега се насочени само кон првенството во коешто имаат три порази, еден од нив од наредните противнички од Работнички Скопје.

 

Натпреварот во салата „Парк“, којшто ќе оди во живо на Собранискиот сервис на МРТ, може да влијае на промена на позициите на струмичките екипи на табелата. Тимот на Струмица жени има биланс 10-3, два бода помалку од Наковски волеј и е четврти, но доколку го совлада составот на Јанта волеј Форца, а градскиот ривал загуби од Работнички Скопје, може да се пробие на третата позиција. Од друга страна, пак, Јанта волеј Форца заостанува две победи зад Наковски волеј и зад Струмица жени, така што доколку сака да има реални, а не само теоретски шанси за влез во полуфиналето на разигрувањето, тогаш утре треба да игра за триумф на жешкиот терен на дебитантот во најквалитетното женско одбојкарско друштво кај нас.

 

Во другиот натпреварувачки сегмент, Втората фаза-2, Универзитет во Тетово и Ускана утре ќе играат за второто место коешто е осмо во конечното рангирање на крајот на сезоната. Двата состава имаат по четири победи, а прв е УГД Студент жени којшто на петти март ќе гостува кај Македонија Макс. Струмичанки исто така имаат четири победи, па можат да се надеваат на подобар пласман од сегашната четврта позиција. Чекор напред може да планира и тимот на Пелистер волеј, но само доколку во ова коло оствари планирана победа над последнопласираниот Бами Кор, а потоа да совлада и некоја од екипите со подобар ефект досега.

 

Прва лига (жени), Втора фаза-1, 3.коло

Струмица жени – Јанта волеј Форца (сабота, 13.00)
Наковски волеј – Работнички Скопје (понеделник, 17.00, пренос на МРТ Собраниски)
Вардар жени – Виктори волеј 3:0 (25:10, 25:14, 25:7)

Прва лига (жени), Втота фаза-2, 3.коло

Универзитет во Тетово – Ускана (сабота, 16.30)
Пелистер волеј – Бами Кор (сабота, 12.00)
Македонија Макс – УГД Студент жени (5.март, 19.00)