Category: Домашно првенство

Одбојкарски шампионат на Македонија (жени), Втора фаза-1, (1.коло)

Работнички – Жени, Работнички – Скопје и Наковски волеј бараат потврда за пласман во разигрувањето

 

Најдобрите шест екипи досега, во таканаречената Втора фаза-1, ќе играат според двокружен бод систем (еден натпревар дома, еден на гости, вкупно десет натпревари), при што важат резултатите од досегашната етапа од сезоната. По завршувањето на овој дел, првопласираните четири екипи ќе обезбедат настап во разигрувањето за пехарот, а другите две ќе завршат со натпреварувањето

 

1) „Работнички – Жени“ – „Виктори волеј“ (петок, 18.00)
По максимални десет победи во есенскиот дел, од коишто осум беа со резултат 3:0, екипата на Работнички – Жени влегува како најголем фаворит за првото место и по Втората фаза-1 во нашата најквалитетна женска одбојкарска лига. Виктори волеј ја оствари целта и успеа да се пласира во првите шест на табелата, со што и натаму ќе биде дел од елитното друштво, а со оглед дека е на негатива од само еден триумф во однос на четвртопласираниот Пелистер волеј, струмичкиот состав има шанса да обезбеди полуфинале од разигрувањето за титулата. Сепак, и покрај тоа што се засили со Софија Ричлиева, која се врати од Турција и со Симона Митрева, која досега настапуваше за Наковски волеј, одбојкарките на Работнички – Жени се апсолутни фаворитки во денешниот дуел во салата „Градски парк“ во Скопје. Првиот меѓусебен дуел сезонава беше одигран во Струмица, а на него славеше гостинскиот тим со 25:17, 25:22 и 25:13. Анастасија и Ѓорѓина Јорданова се нови одбојкарки во редовите на екипата од главниот град.

 

2) „Работнички – Скопје“ – Јанта волеј“ (сабота, 15.00)
Како и во првиот сегмент од сезоната 2018/2019, Работнички – Скопје и Јанта волеј ќе играат и на отворањето на вториот. На 20-ти октомври актуелните првенки ја имаа предноста на домашниот терен, но Работнички – Скопје славеше со 3:1 (25:15, 25:19, 20:25 и 25:13). Според остварувањето досега, а имајќи ја предвид предноста на домашниот терен во салата „Градски парк“ во Скопје, второпласираниот тим на табелата ја носи фаворитската ролја. Работнички – Скопје има биланс 9-1, а единствениот пораз го претрпе од водечкиот состав на табелата. Јанта волеј, пак, имаше половичен ефект 5-5, играше променливо, а сега ќе се обиде да изненади користејќи ги трите нови одбојкарки во ротацијата: Вероника Анастасова, Николина Грујова и Рони Настева. Работнички – Скопје може да се пофали со ангажман на две искусни одбојкарки. Еми Веселкоска, која најголем дел од кариерата мина во шампионската екипа на Јанта волеј, дебито за новиот ќе го има токму против поранешниот клуб. Ерјона Јонузи дојде од Универзитет во Тетово и исто така ќе биде силен адут за Работнички – Скопје во трката за пехарот.

 

3) „Наковски волеј“ – „Пелистер волеј“ (сабота, 17.00)
Најблиску до двете скопските екипи со името Работнички беше Наковски волеј. Струмичкиот тим се израдува на осум победи, а единствените два пораза ги претрпе токму од подобропласираните од него. Затоа, во пролетниот дел од шампионатот сосема очекувано е Наковски волеј да остане блиску до врвот, а со тоа и да обезбеди учество во полуфиналето од разигрувањето. Пелистер волеј се врати во нашата Прва лига и беше пријатно освежување со шест победи со коишто го освои четвртото место. Амбициите на битолскиот клуб се да остане во водечкиот квартет, а со тоа да игра и во елиминацискиот дел. Наковски волеј го доби есенското соочување во својата сала со 3:1 (25:19, 21:25, 25:13, 25:15), а на Пелистер волеј останува обврската да се обиде да го поправи гостинскиот биланс. Одбојкарките во зелено-бело есеноска остварија само една гостинска победа, но таа беше токму во Струмица против Македонија Макс. Надежите се дека засилувањето Хане Олденхоф од Холандија можеби ќе придонесе да се надмине гостинската бариера. Наковски волеј има две нови одбојкарки, Ивана Андонова и Емилија Тасева.

 

Одбојкарски шампионат на Македонија (жени), Втора фаза-2, (1.коло)

Универзитет во Тетово и УГД Студент се во пол-позиција за утешната награда

 

Петте екипи коишто не успеаја да обезбедат учество во елитниот натпреварувачки сегмент, во Втората фаза-2, исто така ќе играат според двокружен бод систем (еден натпревар дома, еден на гости, десет кола, вкупно по осум натпревари), по што ќе биде познат нивниот конечен пласман за сеонзта 2018/19

 

4) „УГД Студент“ – „Македонија Макс“ (сабота, 18.00)
Штипјанки не можеа да се надеваат на влез во елитното натпреварувачко друштво само за една победа, но би требало да гсо водат главниот збор во сегментот за пласман од седмото до единаесеттото место. УГД Студент славеше четири победи на десетте есенски натпревари, а Македонија Макс не победи ниту еднаш, а притоа не освои ниту сет, па јасно е со какви шанси струмичанки ќе патуваат во СС „Јордан Мијалков“. Засилувањата од Виктори волеј Велика Карајлиска и Даниела Владевска носат надеж кај Македонија Макс дека оваа пролет може да биде попријатна. УГД Студент ги задржа одбојкарките што настапуваа и во досегашната фаза од сезоната.

 

5) „Ускана“ – „Бами Кор“ (сабота, 16.00)
Во меѓусебната пресметка во второто коло од сезоната, Ускана и Бами Кор одиграа неизвесен натпревар во којшто гостинките од Тетово се радуваа со 3:2 иако противничките двапати водеа освојувајќи ги првиот и третиот сет. Тогаш Бами Кор дојде до максимални две победи, но потоа влезе во низа од осум порази, за разлика од Ускана која ги доби последните два меча есеонска. Така, двете екипи имаа ист биланс 2-8, но кичевки се позиција погоре на табелата поради поголем број бодови. Ускана во пролетниот дел ќе настапува со значително променет состав, затао што има дури девет нови одбојкарки: Михаела Тодороска, Марија Илиевска, Бранислава Тасевска, Ивана Пејоска, Елена Нестерова, Матеа Кофилоска, Ања Шумејко, Михаела Тодороска и Марија Илиевска. Кај Бами Кор нема промени во играчкиот кадар.

Во ова коло слободна е екипата на Универзитет во Тетово.

Одбојкарски шампионат на Македонија (мажи), Втора фаза-1, (1.коло)

Почнува главната битка за пласман во разигрувањето

 

Најдобрите шест екипи од есенскиот дел во првенството, за пласман во разигрувањето ќе одиграат десет кола според принципот секој со секого, дома и на гости. Притоа важат сите резултати од претходните девет натпревари, така што Џио Струмица почнува од првото место со девет победи, Универзитет во Тетово има осум, Вардар и Весна Пробиштип по 6, со тоа што скопскиот тим е третопласиран поради поголем број освоени бодови. Лирија е петта со пет, а Шутова шеста со четири победи. Откако ќе завршат пролетните десет кола, најдобрите четири екипи ќе играат во полуфиналето на разигрувањето

ОК Џио Струмица

1) „Џио Струмица“ – „Шутова“ (недела, 15.30)
Во КГС „Партизан“, најдобриот тим во есенскиот дел од сезоната ќе ја пречека реновираната Шутова којашто има значително поголеми амбиции во оваа фаза од првенството. Џио Струмица досега забележа максимални девет победи и не загуби сет, така што со оглед на доминацијата во лигата, повторно ќе ја носи фаворитската улога. Репрезентативецот Славе Наков се врати од косовската екипа Дреница, а Ристо Балџиев реши повторно да се активира, па тренерот Кирил Ричлиев ќе има уште посилен состав во однос на првите девет натпревари. Но во тој контекст, и Шутова доживеа целосна промена. Долгогодишниот македонски репрезентативец Ѓоко Јосифов претстојната пролет ќе го носи дресот на Шутова и ќе биде огромно засилување на позиција среден блокер. Во Кичево пристигнаа и Бразилецот Рабел Коељо, Србинот Игор Суботиќ, техничарот Ѓоко маџиров, како и Станислав Азаров и Давид Сотировски, така што тренерот Бејтула Емини ќе има значително повеќе опции во играта. Со тоа, се разбира и шанса да го поправи впечатокот од есенскиот дел во којшто оствари четири победи на девет натпревари и со шестото место го фати последниот воз за настап во Втората фаза-1 од лигата. Првиот меѓусебен меч сезонава, Џио Струмица го доби со 3:0 на гостински терен (25:17, 25:19, 25:16).

 

2) „Универзитет во Тетово“ – Лирија“ (сабота, 19.00)
Локалните тетовски ривали успеаја да се најдат во најдобрата шестка во најквалитетната македонска одбојкарска конкуренција. Универзитет во Тетово заврши второпласиран со осум триумфи и со пораз единствено од шампионот Џио Струмица уште во првото коло. Тоа значи дека Универзитет е во серија од осум победи во пресрет на почетокот на Втората фаза-1 од Првата одбојкарска лига. Лирија, пак, беше петтопласирана со биланс 5-4, а во меѓусебната пресметка на 15-ти декември загуби убедливо со 3:0 (25:13, 25:15, 25:18). Двата тима претрпеа промени за оваа натпреарувачка етапа. Сашко Ивковиќ од Лирија замина во Универзитет во Тетово, а во спротивна насока се упати Елфат Абди. Значајна аквизиција на второпласираната екипа е Флаурент Исљами кој дојде од Шутова, а иста релација во преодниот рок имаше и за Наим Абази. За Универзитет во Тетово пријавен е и Јавор Генов. Лирија ќе има тројца нови одбојкари, покрај Абди, дресот на тимот од Жеровјане ќе го носат и Менсур Хамзаи и Александар Лепидовски.

 

3) „Вардар“ – „Весна Пробиштип“ (сабота, 15.00)
Големо внимание привлекува и натпреварот меѓу актуелниот вицепрвак Вардар и ланскиот финалист на купот Весна Пробиштип. Двата тима во есенскиот сегмент забележаа по шест победи, па скопјани беа третопласирани поради поголем број освоени бодови. Фактот што првиот меѓусебен дуел заврши во пет сета во полза на пробиштипјани (24:26, 25:15, 23:25, 25:19, 15:10), а притоа вардарци водеа двапати, зборува дека и претстојното одмерување на силите треба да биде неизвесно. Досегашните играчи на УГД Студент Стефан Алексов и Љупчо Зенделов ќе ја зголемат конкуренцијата во Весна Пробиштип, а Вардар го задржа истиот состав којшто настапуваше на претходните девет средби, па тренерот Деан Стојанов може да смета на воиграноста како адут на неговата екипа во саботната пресметка во СЦ Форца во Скопје.

 

Одбојкарски шампионат на Македонија

Репрезентативците се вратија дома, Славе Наков во Џио Струмица, Ѓоко Јосифов во Шутова

 

Ѓоко Јосифов
Славе Наков

Во пресрет на пролетниот дел од одбојкарското првенство на Македонија во двете конкуренции, дел од екипите го освежија играчкиот кадар обидувајќи се да создадат квалитет којшто ќе одговара на нивните амбиции. Првопласираната екипа кај мажите, Џио Струмица, којашто на девет натпревари забележа девет победи без да загуби сет, во своите редови врати двајца проверени одбојкари. Репрезентативниот среден блокер Славе Наков замина од косовската екипа Дреница и повторно ќе игра за бранителот на ланската двојна круна. Дресот на Џио Струмица ќе го носи и Ристо Балџиев, кој реши да се врати на терените и да ја продолжи кариерата. Шутова којашто освои шампионската титула во 2016-тата, втората фаза ќе ја почнеод шестата позиција, но амбициите за пласман во разигрувањето и се зголемуваат со оглед дека потпиша со шестмина нови одбојкари. Најзвучна аквизиција за кичевскиот тим е долгогодишниот репрезентативен среден блокер Ѓоко Јосифов, а покрај него, силни адути за Шутова ќе бидат Бразилецот Рабел Коељо, Србинот Игор Суботиќ, Ѓоко Маџиров на позиција техничар, како и Станислав Азаров и Давид Сотироски. Второпласираниот Универзитет во Тетово ги обезбеди Сашко Ивковиќ од Лирија и поранешните членови на Шутова Флаурент Исљами и Наим Абази. Стефан Алексов и Љупчо Зенделов се нови играчи на Весна Пробиштип, Елфат Абди, Менсур Хамзаи и Александар Лепидовски ќе настапуваат во Лирија, а Иван Христовски и Димитар Илиевски ќе го облечат дресот на Јанта волеј. ГОК Борец ќе се обиде да ја унапреди формата со помош на Филип Ајдаров, на Илија Илиевски и на Дејан Гиновски.

Кај дамите, исто така, имаше интересни потези на одбојкарскиот пазар. Најмногу профитираше екипата на Работнички – Скопје, којашто ги ангажираше Еми Веселкоска и Ерјона Јонузи. Веселкоска порано беше дел од шампионскиот состав на Јанта волеј, а Јонузи настапуваше за Универзитет во Тетово. Ускана ангажираше дури осум, а во трката за врвот, Наковски волеј и Работничи – Жени се освежија со по две нови одбојкарки.

Познат е календарот за втората фаза во натпреварувачката 2018/2019

Пролетниот дел од сезоната ќе трае повеќе од три месеци

 

Одбојкарската сезона кај нас, според вкупниот број натпревари во првенството и во купот, не е ниту до половина. Битката за титулите ќе продолжи на 16-ти февруари, а во вкупно десет викенд термини завршувајќи со 20-ти април, се планирани десетте кола од вториот дел од сезоната. Според правилата за натпреварување, најдобите шест екипи во двете конкуренции ќе се соочат според принципот „секој со секого дома и на гости“, со напомена дека важат бодовите од есенскиот сегмент. Тоа значи дека секоја екипа ќе одигра по десет средби пред првопласираните четири да се пласираат во разигрувањето коешто е планирано за периодот од 8-ми до 24-ти мај. Тимовите коишто во есенскиот дел се пласираа од 7-то до 10-тото место во машка конкуренција, односно од 7-то до 11-тото место кај дамите, исто така ќе играат по два натпревара меѓусебе, по што ќе биде одреден нивниот конечен пласман во сезоната 2018-та/2019-та. Финалните мечеви од одбојкарскиот куп се планирани од трети до петти мај, а претходно ќе има пет термини в среда за одредување на финалистите.

Одбојкарско првенство на Македонија (жени) – 11. коло – преглед

 

Есенската круна за Работнички – Жени, шампионот Јанта волеј обезбеди место во елитното друштво

Одбојкарките на Работнички – Жени се хероини на есенскиот дел од нашата најквалитетна женска одбојкарска конкуренција. Остварија максимални десет победи, а последната против Работнички – Скопје којшто до меѓусебниот дуел немаше загубен сет. Јанта волеј успеа да слави во Штип против УГД Студент – Жени, па стана последната екипа со обезбедена виза за настап во главната натпреварувачка фаза напролет. Покрај првенките, во неа ќе бидат и Работнички – Жени, Работнички – Скопје, Наковски волеј, Пелистер волеј и Виктори волеј. По десет кола според принципот секој со секого дома и на гости, најдобрите четири ќе играат во полуфиналето од плеј-офот. Универзитет во Тетово, УДГ Студент – Жени, Ускана, Бами Кор и Македонија Макс на истиот начин ќе се борат за пласман од седмата до единаесеттата позиција во конечното рангирање

 

  1) „Работнички– Жени“ – „Работнички – Скопје“ 3:1 (25:15, 24:26, 25:13, 25:17)

Во дербито на сезоната во нашиот женски одбојкарски шампионат, Работнички – Жени славеше над Работнички – Скопје во пресметката на двете непоразени екипи до меѓусебниот дуел. Иако гостинскиот состав претходно немаше загубен сет, неуспеа да го почне натпреварот со самодоверба, така што противникот лесно дојде до предност. По израмнувањето во вториот сет, се беше на страна на домашниот тим којшто во десет меча се израдува на десет победи есенва, притоа губејќи еден сет на две, а два сета само на една средба. Работнички – Жени го освои врвот и есенската круна, а Работнички –Скопје првпат ја почувствува горчината на поразот којшто не мора да значи ништо во битката за шампионскиот пехар. До негово освојување има уште многу, а Работнички – Скопје во пролетниот дел од лигата ќе има најмалку уште две шанси да му се реваншира на ривалот за саботниот пораз.

 

2) „Ускана“- „Виктори волеј“  3:2 (28:26, 16:25 ,25:21, 18:25, 15:9)

Ускана направи изненадување совладувајќи го Виктори волеј за победнички крај на оваа етапа од првенството. Кичевки претходно имаа осум порази во осум настапи од почетокот на сезоната, а на последните две пресметки прославија два триумфа со што напредуваа на табелата. Со биланс 2-8, поради поголем број освоени бодови, Ускана е деветтопласирана, а Бами Кор падна на десеттото место. Со успесите против Универзитет во Тетово и против Македонија Макс, Виктори волеј обезбеди учествово првата шестка уште пред гостувањето кај Ускана, но со поразот загуби планирани бодови за продолжувањето на сезоната. Струмичанки остварија половичен ефект 5-5 и ќе презимат на шестата позиција.

 

3) „Македонија Макс“ – „Пелистер волеј“ 0:3 (19:25, 18:25, 16:25)

Пелистер волеј ја смени навиката и ја оствари првата гостинска победа сезонава за влез во водечкиот квартет. Битолските одбојкарки претходно победуваа само дома, но во саботата го искористија натпреварот со последно пласираната Македонија Макс за да завршат со позитивен однос на триумфи и порази (6-4), така што ги оставија зад себе одбојкарките на Јанта волеј и на Виктори волеј. Македонија Макс нема ниту една победа, не освои ниту еден сет, па е најслаба екипа во лигата досега.

 

4) „УГД Студент – Жени“ – „Јанта волеј“ 1:3 (21:25, 16:25, 25:21, 21:25)

Јанта волеј беше подобар од УГД Студент – Жени во директната пресметка за пласман во елитното натпреварувачко друштво напролет. Според ефектот на екипите пред саботниот дуел, освоен сет или пак два сета не можеа да им бидат доволни ниту на едните, ниту на другите. Шампионките одиграа подобро, го неутрализираа гостинскиот терен и на крајот на првата фаза од лигата завршија петтопласирани. Јанта волеј има ист ефект и ист број бодови, но за децимали поддобар сет-количник од Виктори волеј на шестото место. Водечкото трио е далеку, но сезоната е долга, па скопскиот тим има реални шанси да се надева на полуфинале.

 

5) „Универзитетво Тетово“ – „Бами Кор“ 3:1 (25:23, 25:16, 22:25, 25:15)

Локалното дерби го отвори 11-тото коло уште во четвртокот. Во него Универзитет во Тетово славеше над Бами Кор со што освои бодови во битката за пласман од седмото до единаесеттото место во конечното рангирање, а што е уште поважно, обезбеди и финале на традициналниот меморијален турнир „Бранко Хаџииљоски – Чајка“ којшто ќе продолжи и ќе заврши в четврток. Универзитет во Тетово ја оствари четвртата сезонска победа и вториот дел ќе го почне од најдобра позиција во својата конкуренција, а Бами Кор остана на двата триумфа од почетокот на сезоната, по коишто претрпе осум порази во низа, па заврши десетти.

 

Во ова коло слободна беше екипата на „Наковски волеј“.

Одбојкарски шампионат на Македонија (мажи), 9. коло – преглед

 

Струмичани завршија со шампионски манир, Универзитет во Тетово ја задржа низата, Вардар фати залет

Последните шест натпревари од есенскиот дел во нашиот најквалитетен одбојкарски шампионат ја потврдија доминацијата на екипата на Џио Струмица. Шампионот не загуби ниту сет, а зад него е составот на Универзитет во Тетово, којшто има осум победи по ред откако во првото коло загуби токму од струмичани. Вардар оствари три триумфи во последните три меча, така што се проби на третото место, а четврти заврши тимот на Весна Пробиштип. Во елитниот натпреварувачки сегмент напролет, во којшто екипите ќе одиграат десет кола според принципот секој со секого дома и на гости, ќе бидат и Лирија и Шутова. Јанта волеј, УГД Студент, ГОК Борец и Дибра волеј ќе се натпреваруваат за пласман од седмото до десеттото место во конечното рангирање. И овие четири екипи ќе играат дома и на гости, така што за нив остануваат уште шест пролетни натпревари во сезоната 2018/2019

 

  1) „Весна Пробиштип“ – „Џио Струмица 0:3“ (20:25, 17:25, 11:25)

Актуелниот македонски одбојкарски шампион, екипата на Џио Струмица, го заврши есенскиот дел на начин како што ја одигра цела полуетапа од лигата. Шесткратниот првак беше убедлив и доминантен во петокот на теренот на Весна Пробиштип, во одложениот натпревар од осмото коло. Резултатот доволно зборува, а фактот што ланскиот финалист на купот не можеше посериозно да парира во ниту еден сет, освен донекаде во првиот, посочува дека струмичани беа најдобро формираниот состав во изминатите девет лигашки рунди. Нивната супериорност е изразена и преку податокот дека се единствени без загубен сет.

ОК Џио Струмица

 

2) „Шутова“ – „Универзитет во Тетово“ 0:3 (15:25, 19:25, 15:25)

Шутова обезбеди пласман во првата шестка на табелата, а со тоа и настап во елитниот натпреварувачки сегмент напролет, но без оглед што можеше да одигра растоварено против Универзитет во Тетово, сепак, не претставуваше проблем за второпласираната екипа на табелата. Тетовци ја продолжија серијата од осум победи којшто датира од второто коло. Претходно, Универзитет во Тетово загуби само од Џио Струмица на отворањето на сезоната. Шутова го заврши есенскиот сегмент со биланс 4-5 и поради поголем број освоени бодови е пред Јанта волеј.

 

3) „Лирија“ – „Вардар“ 0:3 (22:25, 20:25, 14:25)

Македонскиот вицепрвак играше променливо, но со три триумфи едноподруго, на крајот заврши на третото место на табелата. По успесите над Јанта волеј и над ГОК Борец, во саботата Вардар славеше на теренот на Лирија и со шест победи на девет меча и поради бод предност во однос на Весна Пробиштип, се наоѓа зад двете водечки екипи. Триумфот на скопскиот тим на гостувањето во Тетово има големо значење и за продолжувањето од сезоната, затоа што на вардарци им дава убава предност во трката за пласман во разигрувањето за титулата. Лирија претрпе три порази на последните четири средби и со ефект 5-4 заврши петтопласирана, се уште со шанси за плеј-оф затоа што има победа помалку од Вардар и од Весна Пробиштип.

 

4) ГОК „Борец“ – „Јанта волеј“ 0:3 (19:25, 22:25, 19:25)

Велешкиот дуел од последното есенско коло беше меѓу две екипи од вториот дел од табелата. Јанта волеј очекувано ја потврди фавористката улога, но и покрај желбите уште во дебитантската сезона да игра во поквалитетното друшто во втората фаза, скопскиот тим, сепак, напролет ќе се бори за пласман од седмото до единаесеттото место во конечното рангирање. Јанта волеј го заврши овој дел со две победи, но пред тоа забележа три порази во низа и уште пред деветтото коло ја загуби трката со Шутова за шестата позиција. ГОК Борец, пак, оствари само една победа и тоа против најслабата екипа во лигата, така што велешани завршија претпоследни, без шанса за нешто повеќе.

 

5) „Џио Струмица“ – „УГД Студент“ 3:0 (25:7, 25:17, 25:15)

Откако го добија дербито со Весна Пробиштип во петокот, одбојкарите на Џио Струмица ден потоа одиграа уште еден лесен натпревар, овој пат дома против УГД Студент. Шампионот го потврди првото место со максимален ефект во сите статистички категории, а УГД Студент не можеше ниту малку да се надева на чудо и на трета победа сезонава. Штипјани ги совладаа само Дибра волеј и ГОК Борец, па во продолжението на сезоната ќе се обидат да го задржат осмото место, дури можеби и да го достигнат составот на Јанта волеј којшто има две победи повеќе.

 

6) „Дибра волеј“ – „Весна Пробиштип“ 0:3 (16:25, 11:25,17:25)

Поразот од Џио Струмица на домашен терен не можеше да остави трага во играта на Весна Пробиштип, за фаворитот да има проблеми на гостувањето кај Дибра волеј. Без поголем напор, одбојкарите во зелено-црна комбинација ја забележаа шестата првенствена победа, но поради бод помалку, Вардар е пред нив на табелата. Без разлика на двата пораза на последните три меча, полуфиналистот од ланскиот шампионат има голема шанса повторно да биде меѓу четирите, особено што најверојатно во борбата запласман во разигрувањето ќе има само еден конкурент, а тоа е тимот на Лирија. Дебитантот во нашата најсилна одбојкарска конкуренција, Дибра волеј, не освои ниту еден сет во есенскиот сегмент.

Одбојкарско првенство на Македонија (жени) – 11. коло

 

Дерби на сезоната за есенската круна и директна пресметка за влез во првите шестка

Работнички– Жени и Работнички – Скопје ќе сервираат за да го одбранат максималниот биланс во досегашниот дел од сезоната. Во завршното коло од есенскиот дел, УГД Студент– Жени и Јанта волеј во директен дуел ќе решат за тоа која екипа ќе оди во елитниот натпреварувачки сегмент напролет, а другите натпревари се заосвојување бодови коишто се пренесуваат во натамошниот дел од првенството. Виктори волеј ќе гостува кај Ускана, Македонија Макс ќе го пречека Пелистер волеј, а Универзитет во Тетово вчера го совлада Бами Кор со 3:1

 

  1)„Работнички – Жени“ – „Работнички – Скопје“ (сабота, 20.30)

Во последното есенско коло во женската одбојкарска лига, дерби на сезоната! За првото место на табелата ќе играат двете екипи од Скопје коишто имаат идентично име. Работнички– Жени ќе ја има предноста на домашниот терен во салата „Градски парк“, каде што загуби два сета во дуелот со Наковски волеј, а на сите други средби победи со 3:0. Во вкупниот биланс Работнички – Жени има 27 добиени и три загубени сета. Претставувањето на тимот Работнички – Скопје е уште полесно бидејќи тој на противничките досега не им препушти ниту еден сет, а според овој показател е најдобар состав во првенството. Оттука, натпреварот би требало да биде „јаготка на шлагот“ на одбојкарската сезона во буквална смисла на зборот.  

 

2) „Ускана“ – „Виктори волеј“  (сабота, 14.00)

Триумфите над Универзитет во Тетово и над Македонија Макс во минатите две кола, на составот на Виктори волеј му донесоа пласман во првата шестка на табелата. Од тој аспект, гостувањето во Кичево за струмичанки нема значење, но со оглед дека бодовите од оваа фаза ќе се пренесат напролет, ниту во ова коло нема да има натпревари без значење. Виктори волеј е фаворит затоа што оствари пет победи на девет средби и се наоѓа на четвртото место, а тој пласман ќе го задржи со сигурност со победа од 3:0. Минатото коло Ускана ја забележа првата победа сезонава, па за убав крај на годината ќе се обиде да биде рамноправен ривал против гостинскиот тим.

 

3) „Македонија Макс“ – „Пелистер волеј“ (сабота 18.00)

Пелистер волеј е во иста ситуација како и Виктори волеј. Битолските одбојкарки забележаа пет победи, сите на домашен терен, имаат 14 бода, па доколку победат кај Македонија Макс со 3:0, а Виктори волеј загуби сет, тогаш ќе се искачат од петтото на четвртото место на табелата. Македонија Макс ја носи аутсајдерската улога со оглед дека досега не се израдува на ниту еден освоен сет.

 

4) „УГД Студент – Жени“ – „Јанта волеј“ (сабота, 18.00)

Покрај дербито за врвот, во последното есенско коло од најсилната женска одбојкарска конкуренција кај нас, најголемо значење има натпреварот меѓу УГД Студент – Жени и Јанта волеј. Тоа е директна пресметка за место во поквалитетниот дел од првенството напролет. Двете екипи имаат ист биланс (4-5), освоија ист број бодови (12), но Јанта волеј моментно е седмопласиран поради подобар сет-количник. Сепак, тој параметар нема да решава за конечниот пласман по оваа фаза затоа што калкулациите се едноставни, односно екипата којашто ќе слави, ќе обезбеди место во првата шестка. Актуелниот првак оствари само една победа на претходните пет средби, а штипјанки добија четири од последните шест дуели, така што навидум се во подобра форма. Ќе пресуди ли тоа, останува да покаже соочувањето во СС „Јордан Мијалков“ во Штип.

 

5) „Универзитет во Тетово“ – „Бами Кор“ 3:1 (25:23, 25:16, 22:25, 25:15)

Универзитет во Тетово го доби локалното дерби со Бами Кор, но уште претходно ги загуби шансите да игра во елитниот натпреварувачки сегмент напролет, па оваа победа ќе му донесе бодови во битката за пласман од седмото до единаесеттото место, а што е уште поважно, му донесе и финале на традиционалниот меморијален турнир „Бранко Хаџииљоски – Чајка“. Во првиот сет решавачки беа поените од сервис и од блок на домаќинот, вкупно четири, наспроти само два од овие елементи на составот на Бами Кор. Вториот сет целосно беше на страна на Универзитет во Тетово којшто имаше 12 поени од напад и по четири од блок и од ас, со што противничките не можеа да парираат, но во продолжението Бами Кор заигра подобро и со четири поени од ас и од блок во завршницата успеа да намали на 2:1. Тоа беше се од формалниот гостин на мечот, затоа што во четвртиот сет освои само 15 поени. Универзитет во Тетово ја оствари четвртата сезонска победа, а Бами Кор остана на двете од почетокот на сезоната, по коишто претрпе осум порази во низа.

 

Во ова коло слободна ќе биде екипата на „Наковски волеј“.

Одбојкарски шампионат на Македонија (мажи), 9. коло

 

Шест натпревари во два дена, за подобар ефект на почетокот на пролетниот дел од сезоната

Пред последното есенско коло, познато е дека Џио Струмица, Универзитет во Тетово, Вардар, Весна Пробиштип, Лирија и Шутова обезбедија место во елитниот натпреварувачки сегмент напролет. По зимската пауза, Јанта волеј, УГД Студент, ГОК Борец и Дибра волеј ќе играат за пласман од седмото до десеттото место. Од тој аспект, последното коло од есенскиот дел во Првата машка одбојкарска лига нема да решава ништо. Дводневната програма ќе почне со одложеното дерби од минатата рунда меѓу четвртопласираната Весна Пробиштип и водечкиот состав на ЏиоСтрумица. Универзитет во Тетово против Шутова ќе се обиде да ја продолжи серијата од седум победи, а и соочувањето меѓу Лирија и Вардар има карактеристики на дерби, затоа што е меѓу две екипи коишто се во првата шестка. На гостувањето во Велес, Јанта волеј ќе игра за да го зацврсти седмото место, а со тоа да има значајна предност пред ривалите во продолжението од сезоната. По нивниот денешен меч, струмичани утре ќе го пречекаат УГД Студент, а пробиштипјани ќе истрчаат во салата на Дибра волеј

 

  1) „Весна Пробиштип“ – „Џио Струмица“ (8. коло – петок, 20.00)

Продолжениот одбојкарски викенд кај нас, последен за есенскиот дел од првенството, ќе почне со заостанатиот натпревар од 8-то коло меѓу Весна Пробиштип и Џио Струмица. Во пресметката на ланските финалисти на купот, домаќинот ќе влезе со желба да ја забележи шестата победа, со што би му го нанела првиот пораз на актуелниот шампион. Струмичани досега беа доминантни и на седум средби не загубија сет, а пробиштипјани беа поразени на гостувањата кај Универзитет во Тетово и кај Шутова. Затоа Весна Пробиштип во претстојната пресметка ќе влезе од четвртата позиција, но доколку го совлада лидерот на табелата, ќе го потисне Вардар од третото место.

 

2) „Шутова“ – „Универзитет во Тетово“ (сабота, 18.30)

Со серија од три победи против Дибра волеј, Весна Пробиштип и УГД Студент, Шутова обезбеди пласман во првата шестка, а со тоа и настап во елитниот натпреварувачки сегмент напролет. Во него ќе биде и тимот на Универзитет во Тетово којшто е во низа од седум триумфи, откако на отворањето на сезоната загуби од Џио Струмица пред своја публика. Теоретски, тетовци се уште можат да дојдат и до првото место на табелата, иако тоа е малку веројатна опција, но секако натпреварот во Кичево има значење затоа што екипите во продолжувањето на сезоната ќе го пренесат ефектот од досегашниот тек од шампионатот.

 

3) „Лирија“ – „Вардар“ (сабота, 19.30)

Според резултатите, нишка на дерби содржи и натпреварот меѓу Лирија и Вардар, истотака две екипи коишто во пролетната етапа од лигата ќе се борат за пласман во разигрувањето. Лирија има три порази на последните пет меча, но сезоната ја почна со три триумфи во низа, така што со биланс 5-3 е петтопласирана. Ланскиот финалист во лигата играше променливо, но ги доби последните две соочувања со Јанта волеј и со ГОК Борец, така што со пет победи на осум средби се проби до третото место на табелата. Црвено-црните котираат повисоко од Лирија поради поголем број освоени бодови. Скопскиот тим има 15, а составот од Жеровјане 13.

 

4) ГОК „Борец“ – „Јанта волеј“ (сабота, 15.00)

Без разлика како ќе заврши нивниот дуел, ГОК Борец и Јанта волеј напролет ќе разигруваат за пласман од седмото до десеттото место на крајот на сезоната. Велешани досега ги загубија сите натпревари, со исклучок на оној со Дибра волеј, а Јанта волеј до минатото коло се надеваше дека може да ја освои шестата позиција, но со поразот од Вардар ги загуби и теоретските шанси. Скопскиот состав според билансот може да се изедначи со Шутова, но не може да го достигне бодовниот ефект на противникот.

 

5) „Џио Струмица“ – „УГД Студент“ (сабота, 13.00)

По гостувањето во Пробиштип, шесткратниот македонски првак ќе игра со УГД Студент. Со оглед на максималните седум победи досега, без загубен сет, Џио Струмица несомнено ќе се обиде да остане на успешниот курс и да го заврши есенскиот дел без резултатска дамка. Штипјани ги загубија претходните две средби со Лирија и со Шутова, а со тоа не се во конкуренција за пласман меѓу првите шест екипи на табелата. Нивниот мотив ќе биде да одиграат што подобро и да му дадат што посилен отпор на противникот.

 

6) „Дибра волеј“ – „Весна Пробиштип“ (сабота, 17.00)

Дибра волеј влезе ентузијастички во дебитантската сезона во нашата Прва одбојкарска лига, играше спортски и убедливо ги загуби сите осум натпревари, а притоа не освои ниту сет. Токму овој показател јасно покажува дека Весна Пробиштип е апсолутен фаворит на гостувањето во Дебар и дека секој резултат освен 3:0 во полза на гостинскиот тим ќе биде големо изненадување. За одбојкарите во зелени дресови победата ќе биде значајна за да се заврши оваа фаза со што подобар биланс, а со тоа и влезот во пролетниот дел да биде попријатен. 

Одбојкарско првенство на Македонија (жени) – 10. коло – преглед

 

Виктори волеј и Пелистер волеј се пласираа во првата шестка, шампионот не е сигурен

Фаворитите Работнички – Скопје и Работнички – Жени го задржаа максималниот ефект во пресрет на меѓусебното дерби за крај на оваа фаза од првенството. Актуелните првенки, одбојкарките на Јанта волеј, загубија од третопласираниот Наковски волеј, па во директен дуел со УГД Студент – Жени ќе решаваат за шестото место на табелата. Универзитет во Тетово веќе нема шанси и напролет ќе игра за пласман од седмото до единаесеттото место

 

  1) „Бами Кор“ – „Работнички – Жени“ 0:3 (11:25, 7:25,17:25)

Скопската екипа го потврди квалитетот на гостувањето во Тетово. Работнички – Жени не загуби сет седми натпревар едноподруго, а деветтата првенствена победа ја оствари со само 35 загубени поени. Бами Кор немаше никакви шанси да ја прекине лошата резултатска низа од седум порази и натаму е на деветтото место на табелата. Составот на Работнички – Жени е втор, во пресрет на големото дерби со Работнички – Скопје на крајот на есенскиот дел.

 

2) „Работнички – Скопје“ – „УГД Студент – Жени“ 3:0 (25:16, 25:12, 25:16)

Иако забележа четири победи на последните пет средби, УГД Студент – Жени не можеше да биде пречка за деветтата победа на Работнички – Скопје, ниту пак можеше да се закани дека ќе освои сет. Домашниот тим остана единствен без загубен сет во досегашниот тек од шампионатот, но дури и со таков ефект, се уште нема гарант за првото место по есенскиот дел. Наредниот викенд, во последното коло од оваа фаза, двете екипи со име Работнички ќе играат за лидерската позиција на почетокот на елитниот натпреварувачки сегмент напролет.

 

3) „Јанта волеј“ – „Наковски волеј“ 1:3 (19:25, 25:21, 22:25, 21:25)

Наковски волеј го потврди третото место на табелата со победа над Јанта волеј на гости, во натпреварот којшто го носеше епитетот дерби. Со осум триумфи на десет настапи, струмичкиот состав веќе може да го почне зимскиот одмор затоа што во наредното коло ќе биде слободен. Наковски волеј претрпе порази само од најсилините тимови во нашата најквалитетна женска одбојкарска конкуренција, па со задоволство може да се сеќава на есенската етапа. Јанта волеј, пак, стравува за пласман во елитниот сегмент напролет, затоа што наредното коло ќе му гостувана УГД Студент – Жени, а со евентуален пораз,  актуелниот првак ќе биде во вториот дел од табелата. По десет кола, Јанта волеј има биланс 4-5 со 12 бода, исто како и штипјанки, но скопскиот тим е шестопласиран поради подобар сет-количник. Оттука, нивниот меѓусебен дуел ќе биде решавачки за пласман во шампионската фаза од сезоната.

 

4) „Пелистер волеј“ – „Универзитет во Тетово“ 3:0 (25:23, 25:21, 25:15)

Пелистер волеј го одбрани домашниот терен и против Универзитет во Тетово и со максимален биланс од пет победи пред своја публика и четири порази на гости, битолските одбојкарки се пласираа во првата шестка од шампионатот. Тетовки го претрпеа вториот пораз едноподруго и без оглед што имаат биланс 3-6, веќе ги загубија шансите во трката за шестата позиција. Во последниот есенски дуел со Бами Кор ќе играат за поголем бодовен ефкет напролет, а Пелистер волеј ќе истрча кај МакедонијаМакс за прва гостинска победа сезонава со којашто ќе го задржи позитивниот резултатски биланс.

 

5) „Виктори волеј“ – „Македонија Макс“ 3:0 (25:21, 25:14, 25:20)

На трите порази по ред од шестото до осмото коло, Виктори волеј одговори со две победи, најпрво над Универзитет во Тетово на гости, а во саботата и против Македонија Макс во локалната струмичка пресметка. Тоа е доволно за четврто место на Виктори волеј којшто има подобар сет-количник од Пелистер волеј. Во последното коло, струмичката екипа ќе патува во Кичево кај Ускана, што значи дека има шанса да остане во водечкиот квартет и да го одбие нападот на Пелистер волеј. Македонија Макс, пак, против битолчанки ќе се надева на првиот освоен сет сезонава.

 

Во ова коло слободна беше екипата на „Ускана“.

Одбојкарски шампионат на Македонија (мажи), 8. коло – преглед

 

Шутова обезбеди настап во елитниот натпреварувачки сегмент напролет

Кичевци славеа на гостувањето во Штип и ја остварија четвртата првенствена победа, а трета по ред. Со тоа Јанта волеј нема ниту теоретски шанси да дојде до шестото место на табелата без разлика што продолжениот одбојкарски викенд го почна со триумф над Дибра волеј. Првпат сезонава Вардар забележа две победи едноподруго и се искачи на третото место, а Универзитет во Тетово ја завери втората позиција откако ја продолжи победничката низа и во локалната пресметка со Лирија. Одложено беше дербито меѓу Весна Пробиштип и Џио Струмица

 

  1) „Вардар“ – ГОК „Борец“ 3:0 (25:13, 25:16, 25:6)

Продуктивниот продолжен викенд со две победи, одбојкарите на Вардар сосема очекувано го најавија во дуелот со ГОК Борец. Велешани освоија само 35 поени и го претрпеа седмиот сезонски пораз. Единствената победа ја заблежаа против Дибра волеј, а освен во тој натпревар, во ниту еден друг не заработија сет. Вардарци, пак, се вратија на победнички патеки, а по соочувањето со ГОК Борец  во петокот, создадоа услови првпат сезонава да забележат две победи едноподруго.

 

2) „Универзитет во Тетово“ – „Лирија“ 3:0 (25:13, 25:15, 25:18)

Универзитет во Тетово лесно го доби локалното дерби со Лирија и покажа дека засега е чекор пред ривалот. Домашниот состав влезе силно во натпреварот и во ниту еден сет не дозволи Лирија да парира, па на коло пред крајот на есенскиот дел, Универзитет во Тетово со биланс 7-1 го забетонира второто место на табелата без оглед како ќе одигра против Шутова наредниот викенд. Составот на Акик Ферати има пет трумфи на осум средби, но поради помал број бодови е петтопласиран, зад Весна Пробиштип и зад наредниот противник Вардар.

 

3) „УГД Студент“ – „Шутова“  2:3 (23:25, 25:20,15:25, 25:18, 12:15)

Шутова влезе во форма во вистинско време од сезоната. Третата победа по ред ја забележа на гости кај УГД Студент, а со тоа и теоретски го обезбеди пласманот во елитниот натпреварувачки сегмент напролет. По успесите против Дибра волеј и против Весна Пробиштип, кичевци славеа на теренот во Штип и се израдуваа на четвртата првенствена победа. Со оглед дека шампионот од 2016-та има 14 бода, Јанта волеј не може да стигне со шестото место на табелата, без разлика на тоа како ќе завршат натпреварите од деветтото лигашко коло. УГД Студент остана на две победи и во втората фаза од сезоната ќе игра за пласман од 7-то до 10-тото место.

 

4) „Јанта волеј“ – „Дибра волеј“ 3:0 (25:14, 25:8, 25:18)

Победата над Дибра волеј, сепак, не ги однесе одбојкарите на Јанта волеј во поволна позиција во трката за влез во првата квалитативна шестка во нашата најсилна одбојкарска конкуренција. Скопскиот тим во последното коло ќе се сретне со ГОК Борец, но дури и со победа, нема да може да напредува на табелата. Дибра волеј и по гостувањето кај екипата на Горан Јаневиќ остана без освоен сет.

 

5) „Весна Пробиштип“ – „Џио Струмица“ (одложен)

На барање на Џио Струмица, а со согласност на Весна Пробиштип, беше одложен натпреварот на ланските финалисти од купот. Ќе биде одигран во текот на оваа недела.

 

6) „Вардар“– „Јанта волеј“ 3:0 (25:11, 25:18, 25:20)

Првпат сезонава Вардар оствари две победи по ред, а со тоа се искачи на третото место на табелата. Откако во петокот го совлада ГОК Борец, вчера беше подбар и од Јанта волеј, на тој начин оневозможувајќи му на противникот да се надева дека може да влезе во поквалитетниот натпреварувачки сегмент. Во наредното коло Вардар ќе оди на гости кај Лирија, што ќе биде дерби на трето и на петтопласираната екипа, а Јанта волеј ќе истрача во Велес со цел да пренесе што поголем број бодови во пролетниот дел од првенството.