Ново коло, нова среќа

 

Македонските одбојкари денеска ќе играат со Турција во групата „Це“ на Европското првенство. Во арената „Стожице“ во Љубљана, црвено-жолтите загубија од Финска, но го освоија првиот сет на континенталните првенства, се бореа, беа рамноправен противник до завршницата на сите делови од натпревварот и според сите објективни параметри, пропуштија шанса за подобар резултат. Денеска пред нив е уште посилна репрезентација којашто силата ја потврди со освоен сет против европскиот првак Русија.

 

„Еден пораз не значи ништо. Ни овој натпревар нема да биде одлучувачки. Ако победиме, ништо нема да се реши, па и ако загубиме, исто така и натаму нема ништо да биде решено. Секој сет е важен и треба да играме до крај без разлика на резултатот“, вели селекторот Никола Матијашевиќ.

 

Приемот треба да бите перфектен за да можеме да се надеваме на рамноправен тек на натпреварот. Многу може да ни помогне и подобар сервис отколку вчера протв Финска, како и добра одбрана на турскиот коректор Лагумџија.

 

„Тој е нивно најсилно оружје и е многу моќен играч. Средните блокери им се искусни, станува збор за квалитетен противник“, потенција македонскиот селектор.

 

Против Турција одигравме два домашни натпревара во Европската лига во 2014-тата на коишто славевме двапати губејќи само еден сет. Иако ова е нова и поинаква репрезентација, сепак никој не може да ни ги одземе надежите дека можеме. Преносот од натпреварот е на Првиот нканал на МРТ од 17 часот и 15 минути, во рамки на емисијата посветена на Европското првенство.

 

Елитен предизвик за македонските одбојкари

 

Македонските одбојкари ќе играат на 31-то Европско првенство и тоа е факт, не обичен, туку за историја. Како дебитанти сами ги формираа очекувањата, целта повеќе е желба отколку обврска, она што е задолжително е срце на терен, борба за секоја топка како за живот, максимум и против џиновите. Двата љубљански дена не можат специјално да влијаат на формата, нема да ја истераат ниту тремата, таа ќе биде присутна најмалку до првиот сервис или прием, но се добредојдени нашите одбојкари да се почувствуваат како е да се биде дел од континенталната елита.

 

„Уживаме, но не сакаме да бидеме само обични учесници, сакаме и да победуваме“ вели Никола Ѓорѓиев.

 

Единствениот тренинг во Арената Стожице повеќе послужи македонските репрезентативци да се прилагодат на нејзината големина. Главна сега е анализата на првиот противник, Финска.

 

„Нема што да се плашиме од Финска, тоа е добра репрезентација, но од наш ранг. Треба да бидеме агресивни, да ги намалиме грешките, да се бориме за секоја топка. Тие играат мудро, но имаат проблеми со високите топки. Очекувам ова да биде наш ден, да биде убав ден“, оптимист е капитенот

 

Финците се осумнаесеттипат на ЕП, но паметат и поубави времиња, како 2007-та кога беа четврти. Не се непобедливи, сега ќе се прашува и црвено – жолтиот противник од другата страна на мрежата.

 

Мотив, борбеност, храброст, се разбира и квалитет, но и уживање во дуелите со Финска во четврток во 17.30, со Турција, Русија, Белорусија и со Словенија, тоа е миксот што треба да ги носи нашите одбојкари низ групата Ц и до исполнување на вториот дел од сонот, пласман во осминафиналето.

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

 

Македонските одбојкари го одработеа последниот од четирите тренинзи во Марибор и се упатија кон Љубљана каде што од четврток до вторник ќе ги играат натпреварите од групата “Це” на Европското првенство. Во долгата низа прашања што и како на отворањето против Финците, кажано на наједноставен начин, за да ги оствариме целите на континенталниот самит на којшто сме првпат, потребно е да ги одиграме најдобрите натпревари.

 

“Во мислите треба да имаме дека можеме тоа да го направиме. Прв натпревар е, можеби ќе има трема, мал грч, но дури и да го загубиме првиот сет, не треба да се предаваме, треба да се бориме до крај за секој последен поен. Се надевам, односно знам дека можеме да го направиме тоа”, убеден е примачот Александар Љафтов.

 

Натпреварувачкото ниво е поинакво, па македонските одбојкари треба да одговорат соодветно. Фаворитската улога со задоволство ја препуштаат на противниците, но има и поинакви размислувања.

 

“Еве јас ќе бидам првиот што ќе кажам дека сме поквалитетни од нив и навистина верувам дека в четврток ке ја израдуваме македонската јавност”, оптимистички тонови праќа средниот блокер Ристо Николов.

 

Големата сцена и престижното друштво истовремено се мотивација и товар. Сите во националниот состав се свесни за тежината на настанот и за шансата за поединечна и за тимска промоција. Ова несомнено треба да бидат денови за незаборав за македонската одбојка.

 

МРТ и овој пат ќе биде со нашата репрезентација и ќе ги пренесува преносите од сите натпревари од групата “Це” во Љубљана.

• 

• 

• 

• 

• 

• 

• 

• 

• 

• 

• 

 

Емоциите растат, реалниот пристап останува

 

Македонските одбојкари одбројуваат три дена до дебито на европските првенства и до првиот натпревар против Финска во Љубљана. Експедицијата се уште е во облачниот и сив Марибор каде што денеска на план се два тренинга. Деновите до премиерата на Европското првенство се ситнат, а тоа значи дека емотивен набој е се поголем. Секако во позитивна смисла!

 

“Финците се за респект, но ние имаме свои желби, а имаме и квалитет. Спортот е таква работа, да излезете на терен и да победите. Ние ќе направиме се да излеземе на терен и да бидеме подобри. Ако гледаме рационално, се е на нивна страна, но спорот е работа којашто овозможува да излезете на терен и да се прикажете во најдобро светло, да дадете се од себе, па што биде нека биде”, вели асистент тренерот во стручниот штаб на нашата репрезентација Душко Николиќ.

 

Со Финска досега немаме натпревари, па отсуствува таков параметар за споредба на силите. Без оглед на расчекорот меѓу реномето и резултатите на противникот, ние и натаму веруваме дека за победа кај нас се мора да е на максимално ниво.

 

“Се мора да функционира, сите пет елементи на играта треба да бидат на совршени, а сите ние да имаме свој ден. Нивната предност е во трпеливоста игра, па затоа не смееме да бидеме опуштени и треба постојано да внимаваме”, оценува техничарот Филип Деспотовски.

 

Финска има огромен играчки потенцијал, затоа си дозволи во Европската лига, во квалификациите за Олимпијадата и на пријателските со Естонија да ротира две репрезентации барајќи го вистинскиот тим. Но кој и да игра, јасно е дека на другата страна на мрежата ќе стои екстра квалитет.

 

Првиот тренинг во “Стожице” македонските одбојкари ќе го имаат в среда. Ден потоа секако ќе испиштат историја, но желбата е тоа да биде со прва победа во историското прво учество на големата одбојкарска сцена.

• 

• 

• 

• 

• 

• 

• 

• 

• 

 

Постојаност во непостојаноста, а се бара перфекција

 

Од блесок како против Бугарија, до ситни, но пресудни грешки против Австрија. Македонските одбојкари и натаму се постојани во тоа дека се непостојани во играта, понекогаш без разлика на квалитетот на противникот. Билансот од три победи и пет порази на контролните натпревари за учеството на претстојното Европско првенство воопшто не загрижува. Поважно е репрезентацијата да ги елиминира осцилациите коишто можат да бидат решавачки во престижното континентално друштво.

 

„Треба да ги поправиме сите елементи во играта. Немаме ефикасен сервис, не можеме да нападнеме на тој начин, а во таква ситуација е тешко да се одбраниме“, заклучува примачот на црвено-жолтите Владо Милев. Во текот на подготовките, долго чекавме да проработи и блокот, а во Сент Полтен вчера против Австријците не победивме и покрај десетте освоени поени од овој елемент. Тоа е уште еден едноставен и сликовит показател дека во арената „Стожице“ во Љубљана од 12-ти до 17-ти, во силниот ритам од пет натпревари за шест дена, кај нас треба да функционира се, за да можеме да се надеваме на посакуван резултат во нашиот премиерен настап на европските првенства.

 

„Според мене, ние сме голема репрезентација. Ќе видите дека ќе играме до 20 поени против Русија, а нашиот натпревар со Словенија ќе биде вистинско дерби. Но мора да ги отстраниме ситните грешки во играта, да бидеме на ниво како против Бугарија. Во контролата вчера против Австријците, во сите сетови имавме по три топки коишто ни бегаа и подарувавме по три контри на противникот. Ако ги одземете тие нивни поени и ги додадете кај нас, ние ќе победевме 3:0. Затоа треба да коригираме се, односно да доведеме до перфекција“, вели капитенот Никола Ѓорѓиев.

 

Македонските одбојкари од денеска се во Марибор, на кратко прилагодување пред да се преселат во вторник во Љубљана, местото за наша одбојкарска ренесанса. За да одат чекор напред и да постават нови стандард, треба да ја минат групата во којшто се Финска, Турција, Русија, Белорусија и Словенија. Осминафиналето можеби делува реално, можеби е само желба? Во спортот се дознава лесно, а тие што нема да бидат во „Стожице“, може да дознаат гледајќи ги преносите на Македонската телевизија.

 

Црвено-жолтите со пораз ги завршија контролите пред ЕП 2019

 

Македонските одбојкари претрпеа пораз од Австрија во Сент Полтен со 3:1, во последниот тест натпревар пред настапот на Европското првенство 2019, којшто е дебитантски за нас. За разлика од вчерашниот тренинг меч во којшто избраниците на селекторот Никола Матијашевиќ славеа во сите четири одиграни сета, вечерва Австријците имаа доминантен напад и поуспешен сервис, а ние направивме повеќе грешки, па без оглед на десетте блока, не можевме да извлечеме поволен резултат.

 

Матијашевиќ реши денеска да го врати Љафтов на примачка дијагонала на местото на Милков, а на позиција техничар почна Ѓорѓи Ѓоргиев, по што во игра влезе Деспотовски.

 

По Сент Полтен, македонските одбојкари два дена ќе тренираат во Марибор, а од 10-ти ќе бидат во Љубљана каде што во арената “Стожице” ќе одиграат пет натпревари со надеж дека ќе влезат во осминафиналето на претстојниот континентален собир.

• 

• 

• 

• 

 

Три сета за македонската репрезентација во Сент Полтен

 

Македонските одбојкари ја совладаа Австрија со 3-0 (25:23, 25:23, 25:23) во неофицијалниот тренинг натпревар во Сент Полтен, во пресрет на Европското првенство 2019, дебитантско во нашата одбојкарска историја. Избраниците на селекторот Никола Матијашевиќ утре ќе одиграат уште една, но официјална пријателска средба со Австријците, а тоа ќе биде последна контрола за црвено-жолтите пред учеството на континенталниот собир.

 

На ЕП во групата “Це”, во периодот од 12-ти до 17-ти овој месец, македонската репрезентација ќе игра со Финска, со Турција, со Русија, со Белорусија и со Словенија. Првопласираните четири селекции ќе играат во осминафиналето на шампионатот.

 

Доколку играме како со Бугарија, Финска сигурно ќе падне

 

Селекторот Никола Матијашевиќ ги одреди одбојкарите коишто ќе патуваат во Љубљана и ќе го носат дресот на нашата репрезентација на Европското првенство. Очекувано, Лука Костиќ и Марко Јуниор Стошиќ нема да бидат меѓу четиринаесеттемина коишто од 12-ти до 17-ти овој месец во арената „Стожице“ ќе играат во групата „Це“ со Финска, со Турција, со Русија, со Белорусија и со Словенија. Но, пред натпреварите со историска димензија за македонската одбојка, нашите репрезентативци се обидуваат да ја кренат формата на уште повисоко ниво во однос на натпреварот со Бугарија во Скопје, во којшто го совладаа реномираниот противник со 3:0.

 

„Со изданието против Бугарија, играчите ме убедија дека можеме да играме на Европското првенство, а пред тоа, искрено, не верував дека ќе биде добро. Но доколку играме како со Бугарите, Финска сигурно ќе падне! Игравме зрело, не правевме глупави грешки, со Бугарија ниту една топка не падна на терен, постојано ја допиравме, се боревме. Ги поправивме ситните работи во споредба со пријателските со Шведска, лошо кренати топки, лоша втора топка, лоша комуникација во игра. Она што ме загрижува е здравјето. Но ако сме здрави, мислам дека ќе ја победиме Финска“, капитенот Никола Ѓорѓиев пренесува оптимистички тонови.

 

Македонските одбојкари уште овие два дена ќе тренираат во Скопје, а потоа ќе отпатуваат за Сент Полтен каде што в петок и в сабота ќе одиграат два контролни меча со Австрија.

 

Македонските одбојкари ја совладаа Бугарија, Украина го освои првото место

 

Нашата репрезентација оствари голема победа над Бугарија со 3:0 (25:23, 25:21 и 25:19) и го освои третото место на 43-тото издание на традиционалниот меморијален турнир “Бранко Хаџииљоски – Чајка”. По вчерашниот пораз од Украина во полуфиналето, селекторот Никола Матијашевиќ се реши да почне со Ѓорѓи Ѓорѓиев на позиција техничар, Владо Милев како примач и Филип Маџунков на среден блокер. Делувавме подобро, Бугарите калкулираа и почнаа без нивниот најдобар играч Цветан Соколов, влегоа во нервоза и не можеа да ни парираат. Никола Ѓорѓиев освои 16, Љафтов 11, а Милев 9 поени. Кај Бугарија, Розалин Пенчев заврши со 12, а Соколов со 9 поени.

 

Оваа победа над Бугарија ја зголеми самодовербата кај македонските одбојкари коишто претходно загубија три од четирите контролни средби. До среда ќе тренираат во Скопје, а потоа ќе одиграат два натпревара со Австрија во Сент Полтен, како последна подготовка за настапот на Европското првенство во групата во Љубљана од 12-ти до 18- ти септември.

 

Украина го освои првото место на турнирот “Чајка” откако во финалето ја совлада Белгија со 3:1 (25:22, 22:25, 25:20, 25:22). За најдобар играч беше прогласен украинскиот капитен Олег Плотнитскиј, а за најдобар техничар нашиот организатор на играта Ѓорѓи Ѓорѓиев.

 

Нашата селекција ќе игра со Бугарија за третото место на турнирот “Чајка”

 

Македонските одбојкари беа поразени од Украина со 3:1 (25:21, 25:20, 22:25 и 25:20) во полуфиналето на 43-тото издание на традиционалниот меморијален турнир “Бранко Хаџииљоски – Чајка”. Во другиот денешен натпревар, Белгија славеше над Бугарија со 3:1 (18:25, 25:21, 25:15, 25:18), така што утре за првото место Белгијците ќе се сретнат со Украина, а нашата селекција ќе игра со Бугарија.

 

Поради подготовките за настапот на Европското првенство, организаторите годинава решија конкуренцијата да биде силна, па затоа турнирот се одржува во Скопје, а не во Тетово како што е вообичаено. Во салата “Градски парк”, нашите репрезентативци одиграа солидно против силниот ривал, но се уште сервисот и блокот не се на потребното ниво за да се совлада состав од рангот на Украина. Противникот имаше подобар прием и го користеше тоа со прво темпо да освојува лесни поени. Кај нас, капитенот Никола Ѓорѓиев освои 20, Љафтов 11, а Милков и Николов по 6 поени. Во Украина, Плотнитски заработи 19 поени, а средните блокери искомбинираа 30.

 

Утре од 17 и 30 македонската репрезентација ќе игра со Бугарија, а финалето меѓу Белгија и Украина е од 20 и 15. Двата натпревара ќе бидат пренесувани на Македонската телевизија.