Одбојкарскиот клуб „Весна Пробиштип“ е формиран на 02.07.2013 година на иницијатива на Игор Манасов и на Ласте Јосифов. Манасов е поранешен одбојкар и претседател на клубот од основањето до 12.02.2018, а Јосифов е активен играч на ОК „Весна Пробиштип“. Актуелен претседател е Марјан Панов.

За релативно краток временски интервал, клубот успеа да анимира стотина дечиња во сите категории, па со првата екипа брои околу 120 членови во машка и во женска конкуренција. Од формирањето, генерален покровител на клубот беше Општина Пробиштип, а потоа се приклучи фабриката за батерии ТАБ МАК – Пробиштип, којашто е актуелен генерален спонзор. Одбојката има голема традиција во градот Пробиштип од каде што потекнаа многумина македонски репрезентативци.

Во петгодишниот период од формирањето, најголемиот резултатски успех беше остварен во натпреварувачката 2016/17-та, кога машката сениорска екипа стигна до финалето на првенството, но загуби од „Џио Струмица“. „Весна Пробиштип“ играше и три финалиња во Купот на Македонија, но не успеа да го освои. Двапати беше поразена од „Џио Струмица“, а еднаш од „Шутова“. Кога се зборува за младинските и за кадетските екипи, тие постојано се во врвот во своите лиги и освојуваат медали, па во клупските витрини се две сребра за вицешампионски титули и една бронза.

ОК „Весна Пробиштип“ има профил на социјалната мрежа „Facebook“ којшто го следат 2.600 следбеници.